Биэс тыһыынчаттан тахса киһи доруобуйатын көрдөрдө

Дьокуускайга «ЗдравОсмотр» аахсыйа иитинэн, дьон-сэргэ доруобуйатын көрдөрдө, анаалыстары туттарда. Бу доруобуйа харыстабылын министиэристибэтэ тэрийэр аахсыйатын Дьокуускай олохтоохторо уонна ыалдьыттара сэҥээрэллэрин, сэргииллэрин көрдөрөр.

Иһитиннэриллибитинэн, номнуо 5343 киһи бэйэтин туругун бэрэбиэркэлэппитэ профилактическай мэдиссиинэ суолталааҕын бигэргэтэр. Аахсыйа кэмигэр бэрт элбэх босхо көрүү, чинчийии ыытылынна, сүбэ-ама бэрилиннэ диэн тустаах министиэристибэ бэлиэтиир.

Ол курдук, диспансеризация бастакы түһүмэҕэр 2432 киһи хабыллыбыт. Профилактическай мэдиссиинэ көрүүтүгэр (ПМО) 762 киһи сылдьыбыт. Искэн ыарыытын эрдэ быһаарарга 1104 анаалыс туттарыллыбыт. С гепатит быһаарарга 1230 киһи анаалыс туттарбыт. ЭКГ, саахары уонна холестерины бэрэбиэркэлииргэ хаан анаалыһын туттарарга, көһө сылдьар доруобуйа киинин кэлим чинчийиитигэр 427 киһи сылдьыбыта бэлиэтэнэр.

Фтизиатр уонна реабилитолог сүүстэн тахса киһиэхэ сүбэ-ама биэрбиттэр, дерматолокка 80 киһи көрдөрбүт, кардиолокка уонна психолокка 58 киһи сылдьыбыт. Куһаҕан дьаллыктан аккаастанарга клиническэй психолог 23 киһиэхэ сүбэ-ама биэрбит, нейротрениҥҥэ 21 киһи сылдьыбыт.

Санатар буоллахха, «ЗдравОсмотр» аахсыйа Дьокуускайга култуура уонна сынньалаҥ пааркатыгар күн ахсын 14:00-20:00 ч. атырдьах ыйын 30 күнүгэр диэри ыытыллар. Бу туһунан СӨ доруобуйа харыстабылын министиэристибэтэ иһитиннэрэр.

Сиһилии: https://minzdrav.sakha.gov.ru/news/10696