Элбэх оҕолоох ийэлэргэ страховой биэнсийэ хос ааҕыллар

Биэнсийэни анааһыҥҥа ийэлэр бары оҕолорун көрбүт кэмнэрин ахсаанынан хааччахтааһына суох учуоттуур буолуохтара. Бу хос ааҕыы кэлэр өттүгэр биэнсийэҕэ тахсыахтаах да, билигин биэнсийэни ыла сылдьар да дьахталларга тарҕанар. Бу туһунан ахсынньы 23 күнүгэр Социальнай пуонда Саха сиринээҕи салаатын салайааччыта Марина Герман иһитиннэрдэ.

Онон, урут түөрт оҕоттон ордугу учуоттаабат хааччахтааһын көтүрүллэр, онон элбэх оҕолоох ийэлэргэ үрдэтиллибит биэнсийэни ылар кыаҕы биэриэҕэ.

Оҕону биир аҥаар сааһыгар диэри көрбүт кэм индивидуальнай пенсионнай коэффициент (ИПК) быһыытынан ааҕыллар:

• бастакы оҕоҕо – 2,7;
• иккис оҕоҕо – 5,4;
• үһүс уонна онтон кэлиҥҥи оҕолорго – 8,1.

«Бу саҥа быраабыла уратыта – и 2026 сылтан биэнсийэҕэ тахсар дьахталларга эрэ буолбакка, кырдьар сааһынан эбэтэр инбэлиит буолан страховой биэнсийэни номнуо ыла сылдьар дьоҥҥо эмиэ тарҕанар», – диэн Марина Герман бэлиэтээтэ.

Ахсынньыга киирбит сайабылыанньалартан саҕалаан, биэнсийэ хос ааҕыыта 2026 сыл тохсунньутуттан оҥоһуллуоҕа. Бүгүҥҥү туругунан Саха сиригэр 4672 элбэх оҕолоох ийэ докумуоннарын туттарда.

Сайабылыанньаны хайдах биэриэххэ сөбүй?

«Госуслуги» портал нөҥүө сайабылыанньа биэрэргэ «Перерасчет размера пенсии» диэни талыахха наада. Онтон хос ааҕыллар биэнсийэ көрүҥүн ыйабыт: кырдьар сааһынан эбэтэр инбэлиит буолан. Хос көрүү төрүөтүнэн «Иное основание» диэни талан баран, аһыллар түннүккэ «Учет в стаже периодов ухода за детьми» диэн суруйуохха уонна бары оҕолор ааттарын-суолларын, төрөөбүт күннэрин-дьылларын ыйыахха наада.

Марина Герман этэринэн, сайабылыанньаҕа оҕолор докумуоннарын, холобур, төрөөбүт туоһу суруктарын куоппуйатын сыһыарыахха сөп. Пуонда үлэһиттэрэ киирбит дааннайдары үөрэтиэхтэрэ уонна наада буоллаҕына, чуолкайдыыр ыйытыктары сайабылыанньалаах киһи тус кабинетыгар ыытыахтара.

Эбии консультацияны  Социальнай пуонда Саха сиринээҕи салаатын үлэһиттэриттэн, Биир кэлим контакт-кииҥҥэ босхо нүөмэринэн эрийэн билсиэххэ сөп: 8-800-100-00-01.