«Биэс ынахтаах Бэйбэрикээн эмээхсин» остуоруйа дьоппуон тылынан таҕыста

Санкт-Петербург куоракка А.И. Герцен аатынан  Судаарыстыбаннай педагогическай университет Илиҥҥи тылларга уонна лингводидактикаҕа хаапыдыра омук тылларын факультетын 4 кууруһун  устудьуона Айа-Куо-Наталья Ушканова «Биэс ынахтаах Бэйбэрикээн эмээхсин» саха норуодунай остуоруйатын дьоппуон омук тылыгар тылбаастаан кинигэ таһааттарда.

Мантан инньэ саха остуоруйатын Япония дойдутун оҕолоро ааҕыахтара. Бу аан дойду таһымыгар саха култууратын тарҕатыыга биир улахан кылааты киллэриинэн буолар. Аайа-Куо-Наталья Ушканова  9 кылааска диэри «Айыы Кыһата» оскуолатын, ол кэннэ Санкт-Петербург куоракка омук тылын дириҥэтэн үөрэтэр оскуолатын үөрэнэн бүтэрбитэ. Аҕата — Роман Дмитриевич урбаанньыт. Ийэтэ —  Светлана Ушканова, педагогическай наука хандьыдаата, Тим тхэквондо хаапыдыратын доцена уонна Лесгафт аатынан Национальнай судаарыстыбаннай университетын физическэй култуураҕа, успуорка уонна доруобуйа харыстабылыгар  научнай-чинчийэр отделын сэбиэдиссэйэ.

Аайа-Куо-Наталья Ушканова таһаарбыт кинигэтин туһунан ийэтэ Светлана Ушканова маннык кэпсиир:

««Биэс ынахтаах Бэйбэрикээн эмээхсин» саха норуодунай остуоруйатын тылбааһа атырдьах ыйын 5 күнүгэр Петр I аатынан технологическай  университет кыһатыгар күн сирин көрдө. Аайа-Куо-Наталья Ушканова  бу тылбааһы үөрэнэрин быыһыгар 10-ча ый устата оҥордо. Кини сахалыы тылыттан дьоппуон тылыгар саха остуоруйатын тылбаастаата. Киин куоракка 9-с скылааска диэри «Айыы Кыһата» оскуолаҕа үөрэммитэ, онтон 10-11 кылааска Санкт-Петербург куоракка Омук тылын дириҥэтэн үөрэтэр оскуолаҕа үөрэммитэ. Ол кэннэ билигин А.И. Герцен аатынан  Судаарыстыбаннай педагогическай университет Илиҥҥи тылларга уонна лингводидактикаҕа хаапыдыра омук тылларын факультетын 4 кууруһун  устудьуона буолар.

Саха тылынан ыраастык саҥарар. Оҕо эрдэҕиттэн саха тылынан саҥарарга уһуйбуппут, ону кытта нуучча, английскай испанскай уонна дьоппуон тылынан саҥарар. Тылбааһы саҕалыырыгар Федора Кобякова-Эдьиий Дораны кытта сүбэлэспитэ. Ол курдук, Эдьиий Дора оҕо эрдэҕиттэн омук тылынан умсугуйан үөрэтэрин билэн туран «эһиги саха оҕолоро бары  саха тылынан суруллубут остуоруйалары, кэпсээннэри, хоһооннору,  тылбаастаан атын омук сиригэр  таһаарыахтааххыт, атын омуктар биһиги суруйааччыларбытын,  норуоппут кэпсээннэрин, осуторуйаларын билиэхтээхтэр» диэн эппитэ. Ити санаатын иитэ сылдьан кыыһым бэйэтин баҕа санаатынан кинигэни таһааттарда. Остуоруйа — бу бастакы холонуута. Бу остуоруйаны бастакы ааҕааччыта кэргэнэ буолар. Кэргэнэ Японияттан Осака куораттан сылдьар, эмиэ устудьуон уонна Санкт-Петербург куоракка үөрэнэр.

Манна бэлиэтиир буоллахха, тылбааска кэргэнин олох көмөлөһүннэрбэтэҕэ буолар. Бу кинигэ эһиил Осака куоракка барыахтаах, оҕо дьиэлэринэн аһымал аахсыйа быһыытынан тарҕаныахтаах. Тираһа олох кыра, бэйэбит үбүлээн, ойууларын, дизайнын оҥорон, таҥан таһаардыбыт. Манна кинигэҕэ Саха сирин аҕйылҕатыгар ураты болҕомто уурулунна — Өлүөнэ эбэ очуостара,  кэрэ айылҕата, о.д.а. Уратыта диэн аниме истиилинэн сурулунна, холобур, Японияҕа аниме истиилин олус сэҥээрэллэр».