Һэ-һэ! Күлэбин даҕаны. Бэҕэһээ аллар атаспын Сэлээппэ Сэмэни көрсөн, өөр баҕайы кэпсэтэн, бэл, атаҕым тоҥо сыспыта.
Куолутунан Сэмэн сэһэнэ-сэппэнэ баһаам. Сорох сороҕор, миигин баһыйар дуу дии саныыбын ээ. Киһим омуна-төлөнө бөҕө. Дьиэтин таһыгар тутулла турар таас дьиэни биирдэ хантайан көрбүтэ тохсус этээһигэр тиийбит үһү. “Эчи тоҥмотторун, кыһыннары туталлар ээ”, – диэн сөҕөн-махтайан кэпсээтэ. Кыыһа, хата, кыыһырар үһү: “Сарсыарда эрдэттэн үлэлээн, тыаһаан-ууһаан утуппаттар”, – диэн. Буолаахтаамына, эдэр оҕо утуйуон баҕарар буолаахтаатаҕа.
Дьэ, ол эрээри кыһыннары тутар хайдаҕа буолла? Таас дьиэҕэ олорооччулар билэн эрдэхтэрэ. Ааспыкка эмээхсиним дьүөгэтэ Марыына, били, аатырбыт сэрийээллэрэ буола турар кэмигэр түүн уһукта биэрбитэ, доҕоор, мурун тыаһа муораҕа үһү. Соһуйан: “Хайа, бу тойон Миитэрэй утуйа сытар дуу, муннун тыаһа кини курдук”, – диэн санаан ылбыт. Көр, үчүгэй киинэ түүлүгэр кытта киирбит эбит. “Хаһан даҕаны итиччэ улахан тыастаах мурун тыаһын истибэтэҕим ээ”, – диэн бэйэтэ да соһуйан кэпсээн чэйдии олорон барыбытын күллэрдэ.
Чэ, ол мурун тыаһа диэн, туох буолуой. Куһаҕан салгыны тардар тэриллэрэ эрэ үчүгэйдик үлэлээтин. Көр, Орто Халыма чыырын ыһаарытын сыта Амма Маайатын кыбартыыратыгар киирэр үһү. Маайа барахсан буһарбыт дьэдьэнин барыанньатын минньигэс амтана Хоноҕор Оппуонньатын кыбартыыратыгар тунуйар үһү… Онон, этэргэ дылы, элбэх кыбартыыралаах дьиэҕэ буруйдааҕы булан ылбаккын. Хаачыстыбалаахтык тутуллубут дьиэлэртэн атыылаһаары, дьиэ бөҕөтүн этэрбэстэрэ элэйиэр диэри көрдөөн муҥнаналлар дииллэр. Сөп ээ, ким тыаска-ууска олоруон баҕарыай.
Ол эрээри үрдүк этээстээх дьиэҕэ олорботорбун даҕаны, билигин тыын боппуруоһунан миэхэ дьиэ үрдүттэн хаары түһэрии буолар. Олус сэрэхтээх үлэ. Ону баара дьиэлэр тастарыгар “Натааһанан” бүрүммүт массыыналар харыс да халбарыйбакка мэһэйдээн, хаары түһэрэр үлэни харгыстыыллар дэһэллэр. Сэрэтиини, иһитиннэриини истэн, эрдэттэн халбарытан туруорар тоҕо табыллыбата буолуой? Мантан саас кырыыһаттан таммах таммалаатаҕына, хайа халтарыйаары тииһээйэллэр, буруйдааҕы көрдөөйөллөр. Кытаатыҥ, хаар түһэрэллэригэр мэһэйдээмэҥ!
Һэ-һэ! Үгэспинэн сэрэтэбин.
ИДьМ Мэҥэ Хаҥалас оройуонунааҕы салаатын дьуһуурунай чааһыгар киэһэ балыыһаттан быһаҕынан анньыллыбыт киһи киирбитин туһунан иһитиннэрии…
Арассыыйа Бырабыыталыстыбата соторутааҕыта олоххо саамай наадалаах уонна суолталаах эмп препараттарын (ЖНВЛП) испииһэгин кэҥэттэ. Искэн, генетическэй,…
Ахсынньы 24 күнүгэр ЯК-488 Санкт-Петербург – Дьокуускай рейсин толоруу кэмигэр, салгын аалын хамандыыра, тиэхиньикэ алдьаныытынан,…
Сунтаарга буокса сиэксийэтэ аан бастакытын Сиэйэҕэ тэриллибитэ. Ол курдук, 1959 сыллаахха энтузиаст учуутал, тренер Гаврил…
Өрөспүүбүлүкэҕэ суукка иһигэр 8 буруйу оҥоруу түгэнэ бэлиэтэннэ, олорунан процессуальнай бэрэбиэркэлэр уонна хонтуруоллааһын ыытыллар. Бу…
Ил Дархан Айсен Николаев Арассыыйа Бэрэсидьиэнин көмөлөһөөччүтэ Николай Патрушев салайан ыыппыт (Морской коллегия) мунньаҕар кыттыыны…