Сайылыкпар, даачаҕа көһөн, күөх суугун абылаҥнаах нуһараҥар, алыптаах чуумпуга бигэнэн, ыраас салгыҥҥа куустаран дууһалыын, эттиин-хаанныын сынньанан, чэбдигирэн абыраннахпыан.
Онтум баара…Кыһалҕабынан-наадабынан кыстык дьиэбэр киирэн, тапталлаах Дьокуускай куоратым барахсан түүннэри ньирилээн-ньиргийэн, орулаан-сарылаан, иэрийэ дьигиһийэн олох утуппата. Дэлби ньиэрбинэйдээн, үлтү сылайан нэһиилэ кыанан олоробун. Умна быһыытыйдахха, уоттаах түүҥҥү Дьокуускайбыт утуйбата, сынньаммата, илэ барбыта сүрдээх эбит! Туома, үрүҥ түүннэр саҕаланнахтара…
Түннүкпүт аннынан ааһан иһэр ыччаттар ыһыылара-хаһыылара, күлсүүлэрэ-часкыырдара, эчи, массыына элбээбитин, ити үлүгэр түүннэри ханна сыбыытыыллара, айанныыллара буолла. Аарыма самасыбааллар, 40-60-нуу туонналаах таһаҕас тиэйэр массыыналар куорат дьиэлэрин сыбахтара хоҥнуор диэри титирэстэтэн ааһаллар. Билиҥҥи сайдыылаах олохпутугар тоҕо маннык аарымалар куорат ортотунан хара буруонан ыһыыран, ыырдарынан-дьаардарынан тумнаран сыылаҥхайдыылларый? Саатар дьон утуйар, сынньанар кэмнэригэр тохтооботтор. Тоҕо баччааҥҥа диэри итинник массыыналар, ыарахан тырааныспар куорат таһынан, эргимтэ суолунан сырыылара олохтоммотуй. Куораппытын киэргэтэр киэҥ, сырдык Чернышевскай, Хабаров, Лермонтов уулуссалар куорат чэрчитинэн ааһар учаастактарынан ыарахан уйуктаах массыыналар сырыыларын олорчу тохтотор кэм кэлбэтэ дуо?
Уопсастыбаннай бэрээдэги, сокуону куруубай кэһээччилэринэн оҕолор, ыччаттар буоллулар. Бэйэтэ сүүрэр самокаттан, квадрациклтан саҕалаан, матасыыкыл арааһа элбээбитэ, таптаабыт сирдэринэн элэстэнэллэр. Өлө да сытар киһи олоро биэриэх, орулатан-сарылатан, ордук түүнүн куораты биир гына аймыыллар. Аны биэдэрэ айаҕын саҕа аҥайбыт глушителлээх омук массыыналаах эрэттэр дааҕынатан, салгыны сатаратан дөйүтэ сыһан ааһаллар. Күнүһүн этэ да барбаппын, түүнүн дьон сынньалаҥын аймааһын, уопсастыбаннай бэрээдэги куруубайдык кэһии тоҕо бохсуллубатый? Килбиэннээх полиция, Суолга бэрээдэги, куттала суох быһыыны-майгыны араҥаччылыыр судаарыстыбаннай иниспиэксийэ тугу көрөллөрүй, сэрэтэр, бэрээдэктиир үлэни ыыппаттарый.
2019 сыл тохсунньутугар ылыныллыбыт тыаһааһыны-ууһааһыны бопсор, бэрээдэктиир туһунан Арассыыйа сокуонунан хас биир гражданин үлэтин кэнниттэн чуумпуга дуоһуйа сынньанар кыахтаныахтаах, холкутук оҕотун утутуохтаах, дьиэтигэр-уотугар уоскуйа дьаһаныахтаах. Хата, былыт быыһыттан күн тыкпытыныы, соторутааҕыта куорат Дууматын дьокутааттара КоАП 3.5 ыстатыйатыгар көннөрүүлэри киллэрбиттэрэ хайҕаллаах. Мантан ыла куораппытыгар үлэ күннэригэр 21 чаастан (урут 23 чаастан) сарсыарда 8 чааска диэри (урут 7 чааска диэри), өрөбүл, бырааһынньык күннэргэ 22-тэн 10 чааска диэри чуумпу эрэсиим тутуһуллуохтаах. Сокуон, дьаһал ирдэбилэ булгу толоруллуохтаах. Полиция, ГИБДД, Росгвардия курдук, о.д.а. карательнай уорганнарбыт утуйа сыппакка, быһыыны-майгыны хонтуруоллуу, бэрээдэги илиилэригэр кытаанахтык тутан олоруохтаахтар.
Дьэ, уоттаах, түүҥҥү Дьокуускайбыт түүҥҥү серенадатын «ыллаатахха», сити курдук…
Бүгүн, балаҕан ыйын 18 күнүгэр, Үөһээ Дьааҥы, Өймөкөөн, Өлөөн, Мииринэй, Эдьигээн оройуоннарыгар инчэҕэй хаар түһэрэ…
Өлүөнэни туоратар муостаны тутуу бигэргэммит кыраапыгынан ыытыллар. Генеральнай бэдэрээтчит уонна бэдэрээтчит тутар-таҥар үлэ комплексын хааччыйаллар.…
“Саха сирэ – Дьоруойдар дойдулара” – билиини уонна уопуту туһанарга уочараттаах хардыы, диир байыаннай дьайыы…
“Саха “ГТРК “Быһа биэрии” биэриитин эпииригэр Айсен Николаев буолан ааспыт олохтоох салайыныы уорганнарын түмүгүн туһунан…
Быйыл сайын Эбээн Бытантай улууһун Дьарҕаалааҕар от үүнүүтэ мөлтөҕүн да иһин, сүөһүлээх-астаах тыа ыаллара сыл…
Бу күннэргэ Өймөкөөн улууһугар толору оту тиэммит массыыналар "Халыма" федеральнай айан суолунан Өймөкөөн улууһун туһаайыытын…