Биһиги быраастарбыт Докучаевскайга 200-н тахса эпэрээссийэни оҥордулар

Саха сиринээҕи доруобуйа харыстабылын тиһигэ байыаннай дьайыы саҕаланыаҕыттан демобилизацияламмыт кыттааччылары уонна байыаннай сулууспалаахтар дьиэ кэргэттэрин чилиэннэрин доруобуйаларын чөлүгэр түһэриигэ мэдиссиинэ көмөтүн оҥорор.

Биһиги быраастарбыт дойдуга холбоспут саҥа эрэгийиэннэргэ тиһигин быспакка тиийэн мэдиссиинэ көмөтүн оҥороллор. Бу үлэ Ил Дархан Айсен Николаев сорудаҕынан ыытыллар диэн СӨ Баһылыгын уонна Бырабыыталыстыбатын пресс-сулууспата иһитиннэрэр.

Кулун тутар 2 күнүттэн ДНР Докучаевскай куоратыгар Саха сирин быраастара үлэлииллэр. Ону сэргэ муус устарга Өрөспүүбүлүкэтээҕи харах балыыһатын быраастара Ктовскай уонна Докучаевскай куораттарга бара сылдьыбыттара.

«Быраастар приемнай отделениеҕа суһал көмөҕө наадыйааччылары көрөллөр, хирургия отделениетыгар ыарыһахтарга улахан болҕомто ууруллар. Сыл саҕаланыаҕыттан Докучаевскай куоракка барыта 200-тэн тахса эпэрээссийэ ыытыллынна», — диэн Доруобуйа харыстабылын министиэристибэтин Мэдиссиинэ көмөтүн оҥорор департаменын кылаабынай исписэлииһэ Федора Осипова брифиҥҥэ иһитиннэрдэ.