“Байыаннай дьайыы 247 кыттыылааҕа уонна 211 байыаннай сулууспалаах дьиэ кэргэнин чилиэнэ доруобуйатын чөлүгэр түһэриннэ”

Ил Дархан Айсен Николаев сорудаҕынан, Инбэлииттэри комплекснай чөлүгэр түһэрэр өрөспүүбүлүкэтээҕи социальнай-доруобуйаны чэбдигирдэр кииҥҥэ байыаннай дьайыы кыттыылаахтарын уонна кинилэр дьиэ кэргэттэрин чилиэннэрин доруобуйаларын чөлүгэр түһэрии үлэтэ салҕанар.

“Бүгүҥҥү туругунан, биһиги кииммитигэр комплекснай чөлүгэр түһэриини байыаннай дьайыы 247 кыттыылааҕа уонна 211 байыаннай сулууспалаах дьиэ кэргэнин чилиэнэ ааста. Реабилитацияланар дьоҥҥо эттэрин-сииннэрин туругун үлэтин чөлүгэр түһэриигэ социальнай-психологическай уонна социальнай-мэдиссиинискэй көмө оҥоһуллар” – диэн муус устар 4 күнүнээҕи брифиҥҥэ Инбэлииттэри кэлим чөлүгэр түһэрэр өрөспүүбүлүкэтээҕи социальнай-чэбдигирдэр киин дириэктэрэ Асида Алексеева этэр.

Тустаах киин “Сулус” бассейны кытта үлэтин салгыыр. Манна гидрокинезотерапия ньыматынан дьарыктары ыыталлар. Уйулҕа чааһыгар, анал байыаннай дьайыы кыттыылаахтарын уонна кинилэр дьиэ кэргэттэрин санааларын бөҕөргөтүүгэ Арчы дьиэтигэр ыытыллар алгыс сиэрин-туомун толоруу көдьүүстээҕинэн биллэр.

Итини тэҥэ, үөрэхтээһиҥҥэ, үлэ булуутугар, социальнай өйөбүл миэрэлэрин туһунан байыаннай дьайыы кыттыылаахтарыгар, кинилэр чугас дьонноругар иһитиннэрэр, сүбэлиир тэрээһиннэр салгыы ыытыллаллар. Биэдэмистибэлэри, тэрилтэлэри кытта номнуо 40-тан тахса көрсүһүү тэрилиннэ.

Ил Дархан уонна Бырабыыталыстыба пресс-сулууспата.