Биир эрэ кулгаахха наушнигы кэтии дьүлэй буолууга тириэрдэр

Киһи кулгааҕа тыаһы, дорҕоону икки кулгааҕынан  истэргэ аналлаах. Өскөтүн биир эрэ кулгаахха наушнигы кэтэн иһиттэххэ ноҕурууската уларыйар. Бу сыыйа киһини дьүлэй буолууга тириэрдиэн сөп.  

Уһуннук биир кулгаахха аудио кинигэни, муусуканы истэртэн маҥнай тыас иһиллиэн, салгыы кулгааҕынан истибэт, дьүлэй буолууга тириэрдиэн сөп. Кутталлаах бөлөххө өрүү биир кулгааҕар наушник холбоон истээччилэр, эбэтэр гарнитураны өрүү кэтэ сылдьар колл-центр үлэһиттэрэ киирсэллэр.

Исписэлиистэр сүбэлииллэринэн, бу киһи кулгааҕын мөлтөппөтүн туһугар, наушникка иһиллэр  тыас, саҥа, муусука тулалыыр тыастан (окружающий фоновый шум) улахан буолуо суохтаах. Маны тутуспатахха, номнуо биир сылынан кулгаах истэрэ мөлтөөн барар диэн бэлиэтииллэр.

Аны биир интэриэһинэйэ баар – өрүү наушник кэтэр кулгаах эрэ буолбакка, иккис кулгаах эмиэ мөлтүүр эбит. Тоҕо? Кулгаах улахан тыаска буолбакка, мөлтөх сигналга үөрүйэх, истэ сатаан сыыйа мөлтөөн барар диэн быһаараллар. Онон сэрэхтээх буолар ирдэнэр.