Биир кэлим босуобуйаны 67 тыһыынча оҕо төрөппүтэ ылар

2025 сыл саҕаланыаҕыттан, Саха сиригэр Биир кэлим босуобуйаны 67 тыһыынча оҕо төрөппүтэ уонна 2 тыһыынчаттан тахса хат дьахталлар ыллылар. Бу туһунан Социальнай пуонда Саха сиринээҕи салаата иһитиннэрэр.

Босуобуйаны ыла сылдьар дьиэ кэргэҥҥэ өссө биир оҕо төрөөтөҕүнэ, Социальнай пуонда саҥа төрөөбүт оҕоҕо туох да сайабылыанньата суох, эбии босуобуйаны анаан кэбиһэр. Бу сыыппара үйэтигэр биэдэмэстибэлэр икки ардыларыгар дааннайдары атастаһыы түмүгэр, кыаллар буолла.

Хас да оҕоҕо Биир кэлим босуобуйаны ылар дьиэ кэргэттэр төлөбүрү ылар күнү-дьылы уларытан, барытын биирдэ ылар курдук оҥоруохтарын сөп.

Биир кэлим босуобуйаны ыларга дьиэ кэргэн дохуота хас биирдии чилиэнигэр тиксэринэн, тиийинэн олоруу алын кээмэйиттэн үрдүк буолуо суохтаах. Босуобуйа 1 сылга болдьохтонон, бэриллэр, ол кэнниттэн сайабылыанньаны хаттаан биэриэххэ наада. «Госуслуги» портал нөҥүө биэрэр табыгастаах.

Ийэ хапытаалын сэргэ, Биир кэлим босуобуйа намыһах дохуоттаах ыал олоҕун таһымын үрдэтэргэ көмөлөөх.