Биир кэлим босуобуйаны ааҕыыга уларыйыылар киирдилэр

2025 сылга Социальнай пуонда Саха сиринээҕи салаата 17-гэр диэри саастаах 105 тыһыынчаттан тахса оҕоҕо биир кэлим босуобуйаны анаата. Маны тэҥэ, 3845 хат дьахтар босуобуйаны ылла. Бу босуобуйаны тиийинэн олоруу алын кээмэйиттэн намыһах дохуоттаах дьоҥҥо аныыллар.  

2026 сылга биир кэлим босуобуйаны анааһын усулуобуйата уларыйда. Билигин дьиэ кэргэн дохуотун ааҕыыга оҕо төрөөтөҕүнэ (иитэ ыллахха) биирдэ бэриллэр материальнай төлөбүрдэри, Курскай уобалас олохтоохторугар ыйдааҕы көмөнү киллэрбэттэр.

Хамнастан, урбаан дохуотуттан ураты, үлэтэ суох буолууга бэриллэр босуобуйа эмиэ дохуокка ааҕыллар.

Убаастанар төрүөтүнэн дохуот суох буоллаҕына, бу МРОТ 8 кээмэйиттэн намыһах буолуохтаах диэн ирдэбил сотуллар. 2026 сыл тохсунньу 1 күнүттэн инбэлиитинэн, иитэр киһини сүтэриинэн уонна кырдьар сааһынан биэнсийэ дохуота убаастанар төрүөттэргэ киирсэр буолар.

Өскөтүн 10 ыйы быһа 0 дохуоттаах олорбут эрээри, убаастанар төрүөттээх буоллаҕына, босуобуйаны биэриини аккаастаабаттар.

Кулун тутар 1 күнүттэн алимены ааҕыы бэрээдэгэ уларыйар. Сайабылыанньаны суруйааччы алимены ыларын туһунан суут быһаарыытын, суут бирикээһин туппатах буоллаҕына, биир кэлим босуобуйаны ылар быраабы быһаарарга алимены маннык учуоттууллар: 1 оҕоҕо — эрэгийиэҥҥэ олохтоммут номинальнай ыйдааҕы орто хамнас чиэппэрэ; 2 оҕоҕо — номинальнай ыйдааҕы хамнас үс гыммыт биирэ; 3-тэн элбэх оҕоҕо — номинальнай ыйдааҕы хамнас аҥаара.

Алимент суутунан олохтоммут буолаҕына, эмиэ билиҥҥи курдук ааҕыллар.

Хат дьахталларга биир кэлим босуобуйа суумата:

• 1 зонаҕа (нэһилиэнньэҕэ тиийинэн олоруу алын кээмэйэ 33 460 солкуобай): 50% — 18 235,50 солкуобай, 75% — 27 353,25 солкуобай, 100% — 36 471,00 солкуобай.
• 2 зонаҕа (тиийинэн олоруу алын кээмэйэ 28 026,00 солкуобай): 50% — 15 274,50 солкуобай, 75% — 22 911,75 солкуобай, 100% — 30 549,00 солкуобай.

17 -гэр диэри саастаах оҕолорго биир кэлим босуобуйа: 

• 1 зонаҕа (нэһилиэнньэҕэ тиийинэн олоруу алын кээмэйэ 33 460 солкуобай): 50% — 16 228,00 солкуобай, 75% — 24 342,00 солкуобай, 100% — 32 456,00 солкуобай.
• 2 зонаҕа (тиийинэн олоруу алын кээмэйэ 28 026,00 солкуобай): 50% — 13 592,50 солкуобай, 75% — 20 388,75 солкуобай, 100% — 27 185,00 солкуобай.