Биир кэлим босуобуйаны ыларга убаастанар биричиинэлэр

 2025 сыл тохсунньу 1 күнүттэн биир кэлим босуобуйаны анааһын быраабылалара уларыйбыта. Дохуота суох буоллахха, ханнык убаастанар биричиинэлэри учуоттуулларый?

2025 сылга биир кэлим босуобуйаны ыларга аны дьиэ кэргэн 18 сааһын ааспыт, үлэлиир кыахтаах чилиэнин дохуота 4 МРОТ кээмэйиттэн (хамнас алын кээмэйэ) намыһах буолуо суохтаах.

Быйыл Арассыыйаҕа олохтоммут МРОТ кээмэйэ 22 440 солкуобайга тэҥнэһэр. Ол эбэтэр, ааспыт 12 ый устата дьиэ кэргэн үлэлиир кыахтаах хас биирдии чилиэнин сыллааҕы дохуота 89 760 солкуобайтан намыһах буолуо суохтаах.

Өскөтүн бу 12 ый устата дьиэ кэргэн биир эмит чилиэнин дохуота 4 МРОТ кээмэйиттэн намыһах, эбэтэр, убаастанар биричиинэнэн,  букатын да дохуота суох буоллаҕына, бу 89 760 солкуобайдаах суума кээмэйэ убаастанар биричиинэнэн үлэлээбэтэх ыйдарынан көҕүрүүр.

Убаастанар биричиинэҕэ оҕо көрөн олоруу, инбэлиит киһини, эбэтэр, 80 сааһын ааспыт кырдьаҕаһы көрүү-истии, 3 ыйтан ордук кэмҥэ уһуннук эмтэнии, 23 сааһыгар диэри күнүскү үөрэххэ үөрэнии, аармыйаҕа сулууспа, үлэтэ суох буолуу (Дьарыктаах буолуу киинигэр учуокка туруу ирдэнэр, 6 ыйга диэри үлэтэ суох буолуу ааҕыллар), хаайыыга олоруу уонна босхоломмут кэннэ 3 ый үлэтэ суох сылдьыы, хат буолуу, аҕыйах ахсааннаах хотугу норуот бэрэстэбиитэлэ буолуу киирэллэр.

Оттон үлэлээбэтэх кэмигэр убаастанар биричиинэ суох буоллаҕына, босуобуйаны биэриигэ аккаастыыллар. Аккаас төрүөтүн туоратан баран, биир кэлим босуобуйаны ыларга сайабылыанньаны хос биэриэххэ сөп.