Биир кэлим эксээмэни 7600 оҕо туттарыаҕа

Быйыл биир кэлим эксээмэни (11-с кылаас) 7600, сүрүн судаарыстыбаннай эксээмэни (9-с кылаас) 14313 оҕо  туттарыаҕа. Ити туһунан Үөрэх уонна билим миниистирэ Нюргуна Соколова быйылгы эксээмэҥҥэ аналлаах пресс-кэмпириэнсийэ кэмигэр иһитиннэрдэ.

Ыам ыйын 1 күнүнээҕи туругунан, биир кэлим эксээмэни 7604 киһи туттарарын биллэрбит, итинтэн 176 доруобуйатынан хааччахтаах оҕо. Өрөспүүбүлүкэ үрдүнэн оскуоланы бүтэрээччилэргэ аналлаах 227 эксэмээн тутар пуун үлэлиэҕэ. Итинтэн тоҕус пуун ураты усулуобуйалаах (УФСИН – 9, мэдиссиинэ тэрилтэтигэр – 2, дьиэҕэ – 5). Аудитория уопсай ахсааныттан 67,9 % онлайн кэтээн көрүөхтэрэ.

Оттон сүрүн судаарыстыбаннай эксээмэни 14313 оҕо туттарыаҕа, итинтэн 1154 оҕо доруобуйатынан хааччахтаах. 9-с кылааһы бүтэрээччилэргэ Саха сирин үрдүнэн 329 эксээмэн тутар пуун үлэлиэҕэ, алта пуун – ураты усулуобуйалаах.

“Дойду Бэрэсидьиэнэ биллэрбитин курдук¸быйыл оскуоланы бүтэрээччилэр биир биридимиэти хаттаан туттарыахтарын сөп, күнэ-дьыла биллэр, от ыйын 4 уонна 5 күннэригэр.

9-с кылаастарга аан бастакытын эксээмэн сүрүн түһүмэҕэ омук тылларын эксээмэннэриттэн саҕаланар. Урукку сылларга маҥнай сүрүн биридимиттэри туттараллара” – диэн миниистир быйылгы уларыйыылары эттэ.