Биир кэлим эксээмэни 8 тыһ. тахса киһи туттарыаҕа

Быйыл 7576 оҕо оскуоланы бүтэрэр. Урукку сылларга бүтэрбиттэри кытта ааҕан туран, биир кэлим эксээмэни 8 тыһ. тахса киһи туттарара быланнанар. Ити туһунан СӨ Үөрэҕин уонна билимин миниистирэ Ирина Любимова быһа эпиир кэмигэр иһитиннэрдэ.

Биир кэлим эксээмэн сүрүн түһүмэҕэ ыам ыйын 26 күнүттэн от  ыйын 1 күнүгэр диэри, эбии түһүмэх балаҕан ыйын 6-19 күннэригэр ыытыллыаҕа. Булгуччулаах биридимиэттэринэн нуучча тыла, математика (судургутутуллубут, уустугурдуллубут) буолаллар.

Саха сиригэр сааскы халааҥҥа бэлэмнэнии күүскэ бара турар, ол иһигэр эксээмэн туттарар пууннарга үлэ ыытыллар. “Хас сайын ахсын айылҕа иэдээнэ тахсар, баһаар, тыал, халаан уута. Онон эксээмэн тутар пууннары эрэсиэрбэҕэ хайаан да бэлэмниибит. Күн бүгүн ууга барар кутталлаах 14 улууска,  эксээмэн тутар 50 саппаас пуун баар”, — диэн миниистир эттэ.

Биир кэлим эксээмэн (ЕГЭ) маннык күннэргэ ыытыллар:

Ыам ыйын 26 күнүгэр – география, литэрэтиирэ, химия;

Ыам ыйын 29 күнүгэр – нуучча тыла;

Бэс ыйын 1 күнүгэр – математика (судургутутуллубут, уустугурдуллубут);

Бэс ыйын 5 күнүгэр – устуоруйа, физика;

Бэс ыйын 8 күнүгэр – обществознание;

Бэс ыйын 13 күнүгэр – биология уонна омук тыллара (суругунан);

Бэс ыйын 16 уонна 17 күннэригэр – омук тыллара (тылынан);

Бэс ыйын 19 уонна 20 күннэригэр – информатика уонна ИКТ.