Биир кэлим эксээмэҥҥэ докумуону туттарыы олунньу 1 күнүнэн түмүктэнэр

Биир кэлим эксээмэни туттарааччылар ханнык биридимиэттэри талбыттарын, ыытыллар көрүҥүн ыйан туран олунньу 1 күнүгэр диэри сайабалыанньаларын биэриэхтээхтэр.

Үөрэх уонна билим министиэристибэтигэр иһитиннэрбиттэринэн, 11-с кылаас үөрэнээччилэрэ сайабылыанньаларын үөрэнэр оскуолаларыгар туттараллар, экстерннар – судаарыстыбыннай түмүктүүр аттестацияны туттарарга сыһыарыллыбыт оскуолаларыгар. Урукку сылларга бүтэрбиттэр сайабылыанньаларын олорор сирдэрин үөрэҕин управлениеларыгар, орто оскуолаларга биэрэллэр.

Олунньу 1 күнүн кэнниттэн биир кэлим эксээмэни туттарар туһунан сайабылыанньаны, докумуонунан бигэргэтиллибит убаастанар төрүөтүнэн (ыалдьыы эбэтэр атын) эрэ эксээмэн судаарыстыбаннай хамыыһыйатын (ГЭК) быһаарыытынан ылыахтара.

Быйыл биир кэлим эксээмэн үс түһүмэҕинэн барар: сүрүн болдьох иннинээҕи түһүмэх кулун тутар 21 күнүттэн муус устар 21 күнүгэр диэри, сүрүн түһүмэх ыам ыйын 23 күнүттэн от ыйын 4 күнүгэр диэри уонна эбии түһүмэх балаҕан ыйын 4-23 күннэригэр.

Урукку сылларга оскуоланы бүтэрбиттэр эксээмэни сүрүн түһүмэх эрэсиэрбэҕэ күннэригэр бэс ыйын 20 күнүттэн от ыйын 1 күнүгэр диэри эрэ туттарыахтарын сөп. От ыйын 3 уонна 4 күннэригэр биир эксээмэни хаттаан туттарыы күнэ.

Ил Дархан уонна Бырабыыталыстыба пресс-сулууспата.