Биир кэлим эксээмэҥҥэ сайабылыанньаны олунньу 1 күнүгэр диэри ылаллар

Быйылгы биир кэлим эксээмэн (ЕГЭ) сүрүн түһүмэҕэ ыам ыйын 26 күнүттэн саҕаланар. Маныаха сайабылыанньаны 2023 сыл олунньу 1 күнүгэр диэри ылаллар.

Математика уонна нуучча тыла булгуччулаах биридимиэттэр, онон бары туттараллар. Онтон атыттары оҕолор бэйэлэрэ талаллар.

“Бааза сабылыннаҕына хас оҕо эксээмэни туттарара чопчу биллиэ. Тоҕо диэтэххэ, урукку сылларга оскуоланы бүтэрбиттэр эмиэ туттарааччылар. Сыллата ортотунан 8 тыһ. оҕо туттарар. Олунньу 1 күнүгэр диэри бэлиэтээһини (регистрацияны) ааһыахтаахтар. Манна биридимиэти талыы улахан суолталаах. Оҕолор биридимиэттэрин уларытар буоллахтарына, дааннайдар эмиэ уларыйаллар. Онон олунньу 1 күнүгэр диэри улахан үлэ барар”, — диэн СӨ үөрэҕин уонна билимин миниистирэ Ирина Любимова суруналыыстары кытта көрсүһүүтүн кэмигэр иһитиннэрдэ.

Хас биирдии эксээмэн туттарааччы сайабылыанньатыгар уларытыылары олунньу 1 күнүгэр эрэ диэри киллэрэр кыахтаах. Бу талар биридимиэттэригэр эмиэ сыһыаннаах. Ити ыйыллыбыт болдьох кэнниттэн эксээмэн туттарарын туһунан сайабылыанньаны, ханнык биридимиэттэри таларын туһунан быһаарыыны убаастанар төрүөтү бигэргэтэр докумуоҥҥа эрэ олоҕуран судаарыстыбаннай эксээмэн хамыыһыйата ылынар кыахтаах.

Санатан эттэххэ, эксээмэн сүрүн түһүмэҕэ ыам ыйын 26 күнүттэн бэс ыйын 20 күнүгэр диэри  салҕанар.

Оскуоланы урукку сылларга бүтэрбиттэргэ сүрүн түһүмэх иннинээҕи түһүмэх (досрочный период) кулун тутар 20 күнүттэн саҕаланыаҕа уонна от ыйын 1 күнүгэр түмүктэниэҕэ. Эрэсиэрбэ күннэрэ араас категорияларга муус устар 12 күнүттэн балаҕан ыйын 19 күнүгэри диэри барыаҕа.

Онтон кэллиэс устудьуоннара уонна дойду тас өттүгэр үөрэнээччилэр эксээмэни бэйэлэрин баҕаларынан сүрүн түһүмэх иннинэ (досрочный период) кулун тутар 20 күнүттэн муус устар 10 күнүгэр диэри туттарыахтарын сөп.

9-с уонна 11-с кылаастар эксээмэннэрэ хаһан буоларын манна көрүөххүтүн сөп.