Биир кэлим координационнай киин киэҥ ыҥырыылаах мунньаҕа буолла

Саха сирин Биир кэлим координационнай киинин бэрэссэдээтэлэ, Арассыыйа Бэрэсидьиэнин иһинэн Саха сирин бастайааннай бэрэстэбиитэлэ Андрей Федотов Дьокуускайга анал байыаннай дьайыы кыттыылаахтарыгар уонна кинилэр дьиэ кэргэттэригэр эбии өйөбүллэри тэрийиигэ киэҥ ыҥырыылаах мунньаҕы тэрийэн ыытта.

Тэрээһиҥҥэ норуот дьокутааттаара, улуус баһылыктара, министиэристибэлэр уонна биэдэмистибэлэр салайааччылара, суһал  ыстааб чилиэттэрэ кытыннылар.

«Балтараа сыл анараа өттүгэр Ил Дархан Айсен Николаев Биир кэлим координационнай киини тэрийэргэ быһаарыы ылыммыта. Бу сөптөөх быһаарыы. Биһиги уопсай сыралаах үлэбит түмүгүнэн билигин ситиһиллибит көрдөрүүлэрбит буолаллар. Ол эрээри, биһиги Ил Дархан сорудаҕынан Киин үлэтин салгыы кэҥэтиэхтээхпит. Ол аата байыастары уонна кинилэр дьиэ кэргэттэрин өйүүргэ уонна көмө оҥорорго улуустары кытта ыкса бииргэ үлэлээһини тэрийиэхтээхпит», — диэн бэлиэтээтэ Андрей Федотов.

Мунньахха Ил Дархан сорудаҕынан Саха сиригэр анал байыаннай дьайыы кыттыылаахтарын дьиэ кэргэттэригэр биир кэмнээх матырыйаалынай көмө тиэрдиитэ, оскуолаларынан босхо аһылык анааһына, баай-дуол уонна сир нолуогуттан босхолооһун чэпчэтиитэ көрүллүүтэ, уопсастыбаннай тырааныспардарга босхо айан сырыыларын толуйуута, бастайааннай психологическай уонна юридическай көмө оҥоһуллара бэлиэтэннэ.

СӨ Гражданскай оборуона дьыалатыгар уонна нэһилиэнньэтин олоҕор-дьаһаҕар куттал суох буолуутун хааччыйыыга миниистирэ Дмитрий Лепчиков икки сыл иһигэр Саха сирин байыастарын анал оборудованиенан эбии хааччыйыыга 1,8 млрд солк. тахса суумалаах өрөспүүбүлүкэ бүддьүөтүттэн үбүлээһин көрүллүбүтүн бэлиэтээтэ.

«Маны таһынан байыастарга 880 мөл. солк. тахса суумаҕа гуманитарнай көмө оңоһулунна. 100-тэн тахса байыаннай чааска эбии анал тэрил, оборудование уонна тырааныспар тиксэриллибитэ», — диэн Дмитрий Лепчиков иһитиннэрдэ.

Санатан эттэххэ, Москваҕа Биир кэлим координационнай киин Ил Дархан Айсен Николаев сорудаҕынан тэриллибитэ. Саҥа киин байыастарга уонна кинилэр дьиэ кэргэттэригэр бары өттүнэн көмө оҥоруу, дойду саҥа территорияларын чөлүгэр түһэрии уонна олохтоохторго гуманитарнай көмөнү оҥоруу боппуруостарын дьүүллэһэр. Киин ДНӨ уонна ЛНӨ сирдэринэн территориальнай тирэх пууннара байыаннай чаастары уонна госпиталлары кытта үлэлэһэргэ анаан тэриллибиттэрэ, ону тэҥэ биир дойдулаах байыаннай сулууспалаахтары матырыйаалынай-тиэхиниичэскэй уонна аһынан- үөлүнэн хааччыйыыга анаммыттара.