Биир күн иһигэр итирик туруктаах суоппардартан сылтаан икки суол быһылаана таҕыста

Дьокуускай куоракка биир күн иһигэр итирик туруктаах суоппардартан сылтаан икки суол быһылаана буолла. Бу туһунан Дьокуускайдааҕы Госавтоиниспиэксийэ иһитиннэрдэ.

Алтынньы 12 күнүгэр 19 чааска  42 саастаах  «Toyota Sprinter Carib» массыына суоппара уруулун кыайан туппакка, суолга баар бүтэйгэ кэлэн түспүт. Ол кэннэ   «Mitsubishi Pajero» массыынаҕа баран саайыллыбыт. Дьолго, суол быһылааныгар ким даҕаны эчэйбэтэх.  Мэдиссиинискэй көрүү кэмигэр биллибитэ, эр киһи арыгы испитэ быһаарыллыбыт.

Эмиэ бу күн киэһэ  22 чаас саҕана  40 саастаах «Toyota Gaya» суоппара  олус чугас айаннаан «Toyota Aqua» массыынаны кыттары харсыспыт. Аны ол массыына  «Toyota CorollaFielder»-га баран түспүт.  «Toyota Gaya» суоппара итирик туруктаах эбит.

Госавтоиниспиэксийэ өссө төгүл санатар, арыгы иһэн баран уруулга олорбут суоппар КоАП РФ  12.8 ыстатыйатынан  45000  солк. ыстарааптанар уонна  1,5-2 сылга  массыына ыытар бырааба быһыллар.