Биир күҥҥэ икки суол быһылаанын таһаарбыт

Дьокуускай куоракка биир суоппар икки суол  быһылааныгар кыттыгастааҕын  туһунан Госавтоиниспиэксийэ иһитиннэрдэ.

Алтынньы 30 күнэ үүнэр түүнүгэр,   00:41 чаас саҕана,  Госавтоиниспиэксийэ дьуһуурунай чааһыгар кимэ биллибэт киһи  «Toyota Crown» массыынанан айаннаан иһэн, Михаил Николаев проспегын 13Б №-дээх дьиэтин таһыгар  шлагбаумҥа кэлэн түспүтүн туһунан иһитиннэрии киирбит. Итиэннэ суол быһылаанын таһаарбыт  суоппар куотан хаалбыт.

Аны 40 мүнүүтэнэн эмиэ дьуһуурунай чааска  Кулаковскай уул. 48  №-дээх дьиэтин таһыгар турар «Toyota Aristo» массыынаҕа  «Toyota Crown» кэлэн түспүтүн туһунан иһитиннэрбиттэр. Суол саахала тахсыбыт сиригэр кэлбит Госавтоиниспиэксийэ үлэһиттэрэ быһаарбыттарынан,  41 саастаах «Toyota Crown» суоппара  итирик туруктаах эбит. Итиэннэ Михаил Николаев проспегар тахсыбыт  суол быһылаанын эмиэ кини оҥорбут эбит.