Хаартыскаҕа Андрей Сорокин түһэриитэ. СИА
«Биир ньыгыл Арассыыйа» баартыйа эрэгийиэннээҕи салаатыгар барыллаан куоластааһын кыттааччыларыттан докумуоннары тутуу саҕаланна.
Бүгүн, кулун тутар 8 күнүттэн, «Биир ньыгыл Арассыыйа» баартыйа эрэгийиэннээҕи салаатыгар барыллаан куоластааһыҥҥа кыттар хандьыдааттартан докумуоннары тутуу саҕаланна. Хандьыдааттарга куоластааһын ыам ыйын 22-28 күннэригэр ыытыллыаҕа. Барыллаан куоластааһыҥҥа кыайбыттар баартыйаттан Ил Түмэҥҥэ уонна Дьокуускай куорат Дууматыгар дьокутаакка, олохтоох салайыныы уорганнарыгар баһылыкка итиэннэ дьокутаакка хандьыдаат быһыытынан 2023 с. балаҕан ыйыгар ыытыллыахтаах быыбарга кыттыахтара.
Хандьыдаатынан 21-тэн үөһэ саастаах, суукка тардыллыбатах, кыраныысса таһыгар баайа, бас билиитэ суох Российскай Федерация гражданина буолуон сөп. Барыллаан куоластааһыҥҥа баартыйа чилиэннэрэ итиэннэ баартыйата суохтар хандьыдаатынан туруохтарын сөп. Ил Дархан, «Биир ньыгыл Арассыыйа» баартыйа Саха сиринээҕи салаатын сэкирэтээрэ Айсен Николаев барыллаан куоластааһыҥҥа сүүмэрдээһин хаамыыта дьэҥкэтик ыытыллыаҕын ыйда.
«Бэлиэтээн эттэхххэ, баартыйаттан хандьыдаатынан барыллаан куоластааһыҥҥа кыайбыт эрэ дьон буолуохтара. Ханнык да урукку үтүөлэр аахсыллыахтара суоҕа. Ким чиэһинэй киирсиигэ кыайбыт, ол хандьыдаатынан талыллыаҕа», — диэн Айсен Николаев бэлиэтээтэ.
Барыллаан куоластааһыҥҥа кыттарга докумуоннары бэйэ аҕалан биэрэн эбэтэр тэйиччиттэн олорон ыытан туттарыахха сөп:
1. Бэйэ аҕалан туттарыытыгар Тэрийэр кэмитиэттэр баар сирдэригэр сайабылыанньаны уонна онтон да атын докумуоннары тиксэриллэр.
2. Ил Түмэн быыбарыгар хандьыдааттары талыыга ыытыллыахтаах барыллаан куоластааһыҥҥа кыттарга докумуоннары маннык аадырыска аҕалан туттарыллар: Дьокуускай к., Аммосов уул., 18 дь., 4.01 офис. Дьокуускай куорат Дууматыгар хандьыдааттары талыыга ыытыллыахтаах барыллаан куоластааһыҥҥа кыттарга докумуоннары маннык аадырыска туттарыллар: Дьокуускай к., Ленин проспега, 15 №-дээх дьиэ.
3. Докумуоннары онлайн ыытарга барыллаан куоластааһын PG.ER.RU саайтыгар киирэн, «Госуслуги» порталыгар авторизацияны ааһыллар, эрэгийиэни уонна туһааннаах быыбар таһымын булан баран, пааспар, диплом, онтон да атын докумуоннар сканнаммыт куопуйаларын киллэрэн бэйэ туһунан дааннайдары толоруллар. Хандьыдаатынан турбут кэннэ 30 күн иһигэр Тэрийэр кэмитиэккэ хандьыдаатынан туруу туһунан докумуоннары тус бэйэ аҕалан туттарыахтаах.
Докумуоннары ханнык баҕарар көрүҥүнэн ыытан туттарбыт кэннэ хандьыдаат докумуоннарын дьиҥнээҕин киминэн эрэ, курьерынан эбэтэр почтанан буолбакка, тус бэйэтэ аҕалан туттарар.
Санатан эттэххэ, докумуоннары тутуу муус устар 27 күнүгэр диэри ыытыллар. Ыам ыйын 3 күнүгэр диэри хандьыдааттар бүтэһиктээх испииһэктэрэ быһаарыллар.
Лев Павлов көҥүл тустууга юниордар истэригэр аан дойду чөмпүйэнээтигэр үрүҥ көмүс мэтээли ылары ситистэ. Кини…
Бүгүн, балаҕан ыйын 8 күнүгэр, Саха сирин соҕуруу, хотугулуу-илин, күнүс арҕаа улуустарыгар сорох сиринэн ардах,…
Бүгүн НТВ ханаал “Чудо” биэриитигэр Сунтаар улууһун Элгээйи орто оскуолатын үөрэнээччитэ, эдэр орнитолог, 11 саастаах…
Аҕыйах хонуктааҕыта Сунтаар улууһун Куокуну нэһилиэгэр Улахан Табаҕа киэҥ нэлэмэн, үрдүк үүнүүнү биэрэр бааһыната талах…
Оҕо барахсан хайа да кэмҥэ арахсыспат аргыһа – оонньуур буоллаҕа. Онон “Наука 0+” билим бэстибээлин…
Бу күннэргэ өрөспүүбүлүкэ улуустарыгар ититии сезона саҕаланан эрэр. Мэҥэ Хаҥалас улууһун пресс-сулууспата дьаһалта телеграм-ханаалыгар иһитиннэрбитинэн,…