«Биир ньыгыл Арассыыйа» баартыйа кыайыыта хаһааҥҥытааҕар да итэҕэтиилээх буолла

Сорох социальнай ситимҥэ «Биир ньыгыл Арассыыйа» бэлитиичэскэй баартыйа балаҕан ыйын 14 күнүнээҕи быыбарга бэйэтигэр ылыммыт соругун толорбокко, үгүһү сүтэрбитин туһунан араас суруйуу бэчээттэннэ.

«Нэһилиэктэр, улуустар, куораттар баһылыктарын талыыны сыаналаан көрдөххө, «Ньыгыл Арассыыйа» бэлитиичэскэй баартыйа кыайыыта хаһааҥҥытааҕар да итэҕэтиилээх буолла. Ону туоһулаан, улуус баһылыктарын быыбарын холобурдуохха:

1. Өлөөн эбэҥки национальнай уокуруга — Иван Саввинов, «Ньыгыл Арассыыйа» баартыйа чилиэнэ.
2. Сунтаар улууһа — Анатолий Григорьев, билиҥҥи улуус баһылыга, «Ньыгыл Арассыыйа» баартыйа чилиэнэ.
3. Хаҥалас улууһа — Сергей Гребнев, тутулуга суох хандьыдаат, «Ньыгыл Арассыыйа» баартыйа чилиэнэ.
4. Уус Алдан улууһа — Василий Алексеев, тутулуга суох хандьыдаат, «Ньыгыл Арассыыйа» баартыйаттан праймериз кыайыылааҕа.

Хаҥалас уонна Уус Алдан улуустарын туһунан этэр буоллахха, манна бэлитииичэскэй  баартыйалартан эрдэттэн куоластааһын систиэмэтэ ситэтэ суоҕун көрүөххэ сөп: уопсай быраабыла быһыытынан, быыбарга баартыйа праймериз кыайыылаахтарын эрэ туруорар. Онно сөп түбэһиннэрэн, иккис миэстэни ылбыт Гребнев быыбарга тутулуга суох хандьыдаат быһыытынан барбыта. Покровскай куорат саҥа баһылыга Константинов, кинини киэн тутта билиһиннэрбиттэрин курдук, «Саҥа дьон» баартыйа чилиэнэ, Сергей Гребнев бэйэтэ туруорбут киһитэ. Ол аата баартыйа сотору саҥа чилиэни буолбатах буоллаҕына, өйөөччүнү күүтэрэ чахчы.

Өссө биир  холобур — «Саҥа дьон» баартыйа чилиэнэ Айаал Бурцев быыбарга кыайан, Таатта улууһун баһылыгынан талыллан баран, кулун тутар саҥатыгар  «Ньыгыл Арассыыйа» баартыйа чилиэнинэн буолбута.

Уус Алдан улууһуттан сылдьар Алексеев праймеризка кыайбыта. Ол эрээри сайыны быһа   балаһыанньата кыайан чуолкайдамматаҕа.  Кандидатуратын олохтоох ячейка туруорбатах буолан, кини тутулуга суох хандьыдаат быһыытынан быыбарга кыттыбыта.   «Ньыгыл Арассыыйа» баартыйаҕа киирэригэр киниэхэ туох да мэһэйдээбэт.

Онон баһыйар баартыйа бу быыбарга  тугу да сүтэрбэтэ. Кыра нэһилиэктэр  баһылыктарын уонна куорат уонна тыа сирин нэһилиэнньэлээх пууннарын дьокутааттарын быыбарыгар бэйэлэрин 3-4 кандидаттарын эҕэрдэлиир бэлитиичэскэй  утарсааччылар ахсааннара — муораҕа таммах түспүтүн эрэ курдук ылыныахха сөп. Хаһан буоларын курдук, сөптөөх уонна күрэстэһиилээх быыбар өрүү үтүөҕэ эрэ тиэрдэр» диэн http://t.me/AnalitikaPolitikaYKT телеграм-ханаал суруйар.