«Биир ньыгыл Арассыыйа» баартыйа Саха сиринээҕи салаатын Кэмпириэнсийэтэ түмүктэннэ

Ааһан эрэр сылга баартыйа биир сүрүн ситиһиитинэн  балаҕан ыйын 14 күнүнээҕи биир кэлим куоластааһын күнүгэр «Биир ньыгыл Арассыыйа» итэҕэтиилээх кыайыыта буолбута.

Бу күн өрөспүүбүлүкэ баһылыга Айсен Николаев салайааччылаах баартыйа хандьыдааттара бары мандаат 64,5%-нын ылбыттара.

Кэмпириэнсийэни Саха Өрөспүүбүлүкэтин Ил Дархана, «Биир ньыгыл Арассыыйа» баартыйа Саха сиринээҕи салаатын сэкирэтээрэ Айсен Николаев арыйда.

«»Биир ньыгыл Арассыыйа» баартыйа бары таһымнаах дьокутаакка хандьыдааттары аһаҕас норуот куоластааһынынан эрдэттэн сүүмэрдиир үлэни куруук ыытар уонна хандьыдааттар испииһэктэрин быыбардааччылар бэйэлэрэ оҥорор бырааптарын биэрэр.

2026 сыллаахха Госдуума дьокутааттарын быыбарыгар кыттар хандьыдааттары сүүмэрдиир эрдэттэн куоластааһын процедуратыгар кыттааччылары бэлиэтиир үлэ олунньу бүтүүтэ — кулун тутар саҕаланыыта саҕаланыан сөп. Оттон эрдэттэн куоластааһын ыам ыйын 25-31 күннэригэр ыытыллыа.

Кэнники икки сыл «Биир ньыгыл Арассыыйа» байыаннай дьайыы кыттыылаахтарыгар праймеризка чэпчэтиилэри көрөр. Ол курдук, куоластааһын түмүгэр 25-бырыһыаннаах эбиини, ону таһынан докумуоннары туттарыыга уонна хампаанньаны ыытыыга судургутутуллубут усулуобуйаны биэрэр», — диэн Айсен Николаев бэлиэтээтэ.

Кэмпириэнсийэҕэ сыл түмүктэрин дьүүллэстилэр, кэлэр сылга былааннары торумнаатылар, ону тэҥэ каадыр састаабын саҥартылар. Эрэгийиэннээҕи бэлитиичэскэй сэбиэккэ чилиэннэри эбии таллылар. Ону сэргэ кистэлэҥ куоластааһынынан бэлитиичэскэй сэбиэт Президиумун чилиэннэрин эбии таллылар, «Биир ньыгыл Арассыыйа» пресс-сулууспата суруйар.