Биир оскуола икки учуутала түөкүҥҥэ киирэн биэрэн харчыларыттан маппыттар

Өрөбүллэргэ Саха сирин олохтоохторо түөкүттэргэ 15 600 000 солк. албыннаппыттар. Ити туһунан Ис дьыала министиэристибэтин пресс-сулууспата иһитиннэрэр.

Албыннааһын схемата эмиэ урукку курдук. Күннэтэ сэрэтэр үлэ ыытыллар эрээри, түөкүттэр син биир Саха сирин олохтоохторун араас төрүөтүнэн албынныыллара тохтообот.

Дьокуускай куорат мэдиссиинэҕэ тэрилтэтин 36 саастаах лаборана сымыйа инвестициялааһын плтаформатыгар 9 600 000 солк. тахса сууманы былдьаппыт.

“Мегафонтан” төлөпүөннүүбүт диэн эрийбиттэригэр итэҕэйэн, чугас улуус “Мегафон” 24 саастаах сүбэһит-атыыһыта түөкүттэргэ 2 999 000 солк. ыыппыт.

Аны “ФСБ эрийэбит” диэн албыннаан төлөпүөннээччилэргэ 60 саастаах өрөспүүбүлүкэтээҕи биэдэмистибэ кылаабынай исписэлииһэ 1 620 000 солк. былдьаппыт.

Уус Маайа улууһугар түөкүннээһин икки түгэнэ бэлиэтэммит. Харчылаһарга соруммут биир оскуола учууталлара: 50 саастаах дьахтар “инвестицияҕа” киирэн биэрэн, 645 000 солк., онтон кини 52 саастаах кэллиэгэтэ 736 000 солк. ытыс соттон хаалбыттар.

Холуобунай дьыалалар тэриллибиттэр.