Биир саастаах оҕо манньыаты ыйыстан баран, ыйы быһа сылдьыбыт…

Саха сиригэр биир саастаах оҕо биэс юаньнаах манньыаты ыйыстан кэбиспит уонна ыйы быһа таһаарбакка сылдьыбыт.  Оҕоҕо суһал эпэрээссийэни эндоскопист быраас, 1-кы №-дээх РБ – НЦМ эндоскопическай отделениетын салайааччы Мария Еремеева оҥордо диэн ЯСИА иһитиннэрэр.

Биир саастаах кыыс куолайыгар баар манньыаты алҕас булбуттар. Оҕо ыйы быһа сөтөллөн эрэйдэммит, онуоха быраастар тыҥа рентгенин анаабыттар.

“Оҕону Чурапчы улууһуттан Дьокуускайга аҕалбыттара. Манньыаты куолайын үһүс аҥаарыттан булбуттара, онно киирэн, иҥнэн хаалбыт. Эндоскоп көмөтүнэн, атын эттиги хостоон таһаарбыппыт, оҕо наркозтаах утуйа сыппыта. Куолайыгар кытаанах эттик аалыытыттан, баас үөскээбит. Эпэрээссийэ үчүгэйдик ааста, билигин кыыс туруга этэҥҥэ”, — диэн Мария  Еремеева кэпсээтэ.

Быраас этэринэн, киһи этигэр-сиинигэр саамай кутталлаах атын эттиктэринэн кыракый төгүрүк, литийдээх батарейкалар буолаллар. Балыыһаҕа оннук түбэлтэ элбэх, оҕолор кэлин гастроэнтерология отделениетыгар эмтэнэллэр.

“Литий батарейкалартан ис-үөс салыҥнаах тириитэ быһа сиэтиитэ, бааһырыыта олус кутталлаах. Маннык сиэтии кэнниттэн стеноз буолар, куолай кыараан хаалар. Үксүгэр 9 ыйдарыттан 4-гэр диэри саастаах  оҕолор ону-маны ыйыстан киирэллэр. Оҕолор билэр-көрөр, интэриэһиргиир саастара, кинилэр аан дойдуну айахтарынан билэр майгылаахтар. Оҕо сөтөллөрүн төрөппүттэр болҕойуохтаахтар, ааспат буоллаҕына, салгыы көрдөрүөхтээхтэр. Атын эттик баарын сыраан тохтоло суох сүүрүүтэ көрдөрүөн сөп.  Маны тэҥэ, оҕо кытаанах аһылыктан аккаастанар буолуон уонна куолаһа кэһиэҕириэн сөп», — диэн Мария Еремеева эбэн эттэ.