Биир тыһыынча кэриҥэ киһи ойуур баһаарын умуруорар

Ойуур баһаарын утары 980 киһи охсуһар. Олохтоох нэһилиэнньэттэн 150-тан тахса киһи. Бу туһунан брифиҥҥэ СӨ Экологияҕа миниистирин солбуйааччы Андрей Коноплев иһитиннэрдэ.

Бурятияттан, Забайкалье кыраайыттан уонна дойду атын субъектарыттан 218 парашютист уонна десантник  бааллар. Бу иннинэ Магадан уобалаһыгар ойуур баһаарын утары охсуспут 50 баһаарынай бэҕэһээ Уус Маайа оройуонугар кэлбитэ.

Ойуур баһаарын утары араас ньыманы туттан охсуһуу өрөспүүбүлүкэ иһигэр эмиэ ыытыллар. Бүгүн Уус Маайаҕа, Аммаҕа СӨ баһаары утары судаарыстыбаннай сулууспа — 40 уонна СӨ быыһыыр сулууспа 10 үлэһитэ барыахтара. Уус Маайа оройуонугар СӨ быыһыыр сулууспатын уонна РФ ЫБМ управлениетын аэромобильнай биригээдэтин киллэрэн туран,  37 быыһааччы үлэлии сылдьар. Уоту умулларыыга 45 тиэхиньикэ уонна авиация үлэлиир. Ил Дархан Айсен Николаев туруорсуутунан, Саха сиригэр РФ ЫБМ Ми-8МТВ икки бөртөлүөтэ кэлбитэ.

Өрөбүллэргэ Саха сиригэр 41 ойуур баһаара (иэнэ 16,5 тыһ.га) умуруорулунна. Оттон авиациянан уонна космостан кэтээн көрүүнэн 291 га иэннээх сиринэн 34 ойуур баһаара көстүбүтэ.

От ыйын 10 күнүн сарсыардатыгар барыта 165 ойуур баһаара (уот хаппыт уопсай иэнэ 318 511,5 га) баара бэлиэтэнэр. Итинтэн 5 бохсулунна (826,5 га): 3 – Уус Маайа оройуонугар, биирдии – Алдан уонна Үөһээ Халыма оройуоннарыгар. Нэһилиэнньэлээх пууннарга уонна экэниэмикэ эбийиэктэригэр куттал суоһаабат. Маны сэргэ, 1 ландшафтнай баһаар (иэнэ 256 га) Өймөкөөн оройуонугар баар.

Сезон саҕланыаҕыттан уопсайа 361 ойуур баһаара (уопсай иэнэ 367 872,8 га) бэлиэтэммит. Бу 2021 сылы кытта тэҥнээтэххэ, үс төгүл, уот хаппыт иэнинэн түөрт төгүл кыра. Икки сыллааҕыта бу кэмҥэ 999 ойуур баһаара (иэнэ 1 401 855,07 га) баара бэлиэтэнэн турар. Оттон былырыын 153 841,1 га иэннээх сиринэн 329 ойуур баһаара бэлиэтэммит.

СӨ Ил Дарханын уонна Бырабыыталыстыбатын пресс-сулууспата