Биир суукка иһигэр отуттан тахса баһаары умуруордулар

Ойуур баһаарын утары охсуһааччылар биир суукка иһигэр 19312,5 гектаар уопсай иэннээх 34 ойуур баһаарын умуруордулар. Ол туһунан брифиҥҥэ СӨ экологияҕа, айылҕаны туһаныыга уонна ойуур хаһаайыстыбатыгар миниистири солбуйааччы Андрей Коноплев иһитиннэрдэ.

Авиация уонна космическай мониторинг түмүгүнэн ойуур 18 саҥа баһаара баара биллибитэ. Барыта 389 733,7 гектар сиргэ ойуур 122 баһаара турар. Ол иһигэр, Өлүөхүмэ заповеднигын  сиригэр-уотугар 1 ойуур баһаара турда. Үөһээ Халыма уонна Мииринэй улуустарыгар 2 баһаары киллэрэн туран, 3 баһаар бохсулунна. Ойуур баһаарын 80%  чаҕылҕантан сылтаан саҕаланна. Нэһилиэнньэлээх пууннарга уонна эбийиэктэргэ куттал суоһаабат.

Ойуур баһаардарын умуруорарга 998 киһи, ол иһигэр 113 олохтоох, үлэлиир. Зондировщик-сөмөлүөттэр көтөргө бэлэмнэр.