Бииртэн биир талаан арылынна

Таатта улууһун Харбалааҕар олус сэргэх, дьоро киэһэ буолан ааста.

Тааттатааҕы Федот Семенович Аргунов аатынан оҕо ускуустубаҕа уһуйуллар оскуолатын Харбалаахтааҕы уонна Чычымахтааҕы салааларын отчуоттуур кэнсиэрэ салаа сэбиэдиссэйэ Светлана Тимофеевна Федорова эҕэрдэ тылынан, төрөппүттэргэ махталын тиэрдиитинэн саҕаланна.

Кыайыы 80 сылыгар аналлаах кэнсиэри Севастьянова С.Н. үөрэтэр театральнай кылааһа туруорбут «Путь к победе» диэн теневой туруоруута арыйда.
Фортепиано кылааһын преподавателэ Местникова С.В. гобойга байыаннай ырыалары оонньообута ураты көстүү буолла.
Эстрада кылааһын үөрэнээччилэрэ Виктор Цой репертуарыттан гитараҕа оонньуу-оонньуу, «Группа крови» ыллаабыттара чаҕылхай, сонун нүөмэр буолла (салайааччы В.Г. Власов). Куруук буоларын курдук, Т.К. Кононова уһуйар үҥкүүһүттэрин толоруулара дохсун ытыс тыаһынан биһирэннэ.
Алеша Кычкин «Тааттаҕа» ырыата дьон сэҥээриитин ылыан ылла. В.А.Парфенова салайар тойуксуттарын толоруулара кэнсиэри сахалыы тыыннаата, олус киэргэттэ.
Чычымахтааҕы театральнай кылаас туруорбут пантомималара көрөөччүнү сэргэхситэр нүөмэринэн буолла, салайааччы (В.В.Власова). Антоева В.Г үөрэнээччилэрин ырыалара, Решетникова М.К. фольклорга уһуйбут оҕолорун нүөмэрдэрэ дохсун ытыс тыаһынан доҕуһуолланнылар. Салаа преподавателлэрэ «Кыайыы күнэ» диэн ырыаны ансаамбылынан толорбуттарын көрөөччүлэр олус биһирээтилэр.

Түмүккэ, Изабелла Викторовна Харлампьева уола, ускуустуба оскуолатын бастыҥ выпускнига Леонид Харлампьев аатынан сылын аайы туруорар «Сыл бастыҥ үөрэнээччитэ» истипиэндьийэтин уһулуччу талааннаах, элбэх ситиһиилэрдээх Федорова Айсаанаҕа үөрүүлээх быһыыга-майгыга туттарда. Өр сылларга олус ситиһиилээхтик үлэлээбит Л.М.Кулаковская аатынан истипиэндьийэни оҕолорун ааттарыттан Айаара Атосовна Федорова элбэх ситиһиилэрдээх Чычымах салаатын үөрэнээччитигэр Ноенохова Селенаҕа туттарда.
Ону таһынан, бу дьоро тэрээһини араас өрөспүүбүлүкэтээҕи быыстапкалар кыайыылаахтара-художественнай кылаас үөрэнээччилэрин үлэлэрэ (преподаватель Л.П.Винокурова) тэниччи тардыллан, көрөөччү кутун тутта, сүргэтин көтөхтө.
Оҕолорбут талааннара алмаас таастыы чаҕылыччы оонньоон, көрөөччүгэ үгүс үөрүүнү бэлэхтээтэ. Талааннаах уһуйааччыларбыт кэрэни кэрэхсииргэ үөрэтэр, талааны арыйан, сайыннарар үлэлэригэр ситиһиилэри баҕарабыт.

Валентина КРИВОШАПКИНА, Харбалаах, Таатта.