Биисинэс-инкубаторга дьарыктанан бэйэтэ дохуот киллэринэр оскуола оҕото

Чурапчы улууһун Дириҥ орто оскуолатын 9-с кылааһын үөрэнээччитэ Снежанна Решетникова бэйэ дьарыктаах быһыытынан учуокка туран, тыҥырах оҥоруутунан дьарыктанар.

Бу туһунан истээт даҕаны тута өрөспүүбүлүкэҕэ оҕолорго аналлаах биисинэс-инкубатордаах, агро хайысханан дьарыктанар тарбахха баттанар Дириҥ оскуолатын үлэһиттэрин кытта сибээстэһэ сырыттым.

— Оскуолабытыгар биисинэс-инкубатордаахпыт. Дьарыктаныан баҕалаах оҕолорго миэстэ көрөбүт. Снежанна онно кэлэн бириэмэтин аттарынан үлэлиир. Тохсунньуттан бэйэ дьарыктаах быһыытынан регистрацияланан, дохуот киллэринэр.

Снежанна былырыын “Профессионалы” идэ маастарыстыбатын чөмпүйэнээтин улуустааҕы түһүмэҕэр холонон көрдө. Модуль үс түһүмэхтэн турар: тыҥыраҕы, сирэйи оҥоруу, массаж. Сатабылын өссө чочуйан салгыы кыттар былааннаах.

Маһынан араас декоративнай оҥоһуктары уһанар, 8-с кылааска үөрэнэр Эрсан Петров диэн үөрэнээччилээхпит. Былырыын урбаан эйгэтигэр “Мин биисинэһим” киин тэрийэр “Поколоение биZнес” өрөспүүбүлүкэтээҕи олимпиадатыгар кытынна. Манна оҕолор бэйэлэрин биисинэс былааннарын көмүскүүллэр. Эрсан бэйэтин сиэксийэтигэр бастакы миэстэни ылан, 50 тыһ. солк. суумалаах сэртипикээтинэн наҕараадаламмыта. Салгыы бэйэ дьарыктаах быһыытынан ылсыан баҕарар.

Биһиги үөрэнээччилэрбит сатабылларын, дьоҕурдарын бэлиэтии көрөн төрөппүттэригэр этэбит, миэстэ көрөбүт, араас куонкурустарга кытыннарабыт. Биллэн турар, төрөппүттэн улахан тутулуктаах. Кинилэр оҕолорун баҕатын таба өйдөөн өйөбүл буолаллар, — диэн биисинэс-инкубатор салайааччыта Елена Луковцева этэр.

Снежанна Решетникова тыҥырах оҥорууну өссө икки сыллааҕыта сэҥээрбит. Ол туһунан бэйэтэ бу курдук кэпсиир:

— Улахан эдьийим тыҥырах оҥорор этэ. Олус интэриэһиргээбитим, биир күн кинини үтүктэн холонон көрбүтүм. Урут оскуола оҕолоро мин курдук тыҥырах оҥороллор диэни истибэтэҕим. Интэриниэт маҕаһыынтан ирдэнэр тэрилин сакаастаан, чугас дьүөгэлэрбэр тыҥырахтарын кырааскалыыр буолбутум.

Тыҥырах оҥорорбун учууталларым билбиттэрэ уонна инкубаторга хос биэрбиттэрэ. Былырыын Одьулууҥҥа кууруска үөрэнэн сэртипикээт ылбытым.  Үөрэҕим таһынан нэдиэлэҕэ биир-икки күн быыс-арыт булабын, күҥҥэ биирдии-иккилии киһи сурутар. Бэйэм ыйбыт суумалаахпын, — диир.

Снежанна ирдэнэр тэрилин барытын бэйэтэ хааччынар, киирбит дохуотун барытын бэйэтэ ылар, бэйэ дьарыктаах быһыытынан 14 саастарыттан киирбит дохуотуттан 4 бырыһыанын төлүүр. Күн бүгүн Дириҥ сэлиэнньэтигэр соҕотох маастар. Ол эрээри, оскуолатын бүтэрдэҕинэ олоҕун психологияны кытта ситимниэн баҕарарын туһунан этэр.