Билэр да киһиҥ сэрэхтээх

ИДьМ Алдан оройуоннааҕы холуобунай ирдэбил үлэһиттэрэ суһал-көрдүүр үлэлэрин кэмигэр Алдан оройуонун 29 саастаах олохтооҕо дьиэ-уот тиэхиньикэтин маҕаһыыныгар үлэлиир атыыһыт-консультаны түөкүннээбитин арыйдылар.

Табаар кирэдьиитигэр үп-харчы менеджерынан үлэлиир буолан, дьахтар атыыһыт сөбүлэҥинэн кини аатыгар кирэдьиит каартатын аспыт, ол кэннэ атыыһыттан реквизиттэрин ыйыппыт. Дьахтар сулууспалаах дуоһунаһын уонна  кирэдьиит каартатыгар киирэргэ көҥүл бэриллибитин туһанан, эмсэҕэлээччи аатыгар 155 тыһ. солк. кирэдьиити оҥотторбут. Салгыы бу харчыны устан, бэйэтин наадатыгар туттубут. Тус кэбиниэккэ киириигэ  дьахтар цифровой куодтары туһаммыт, ону кини көрдөһүүтүнэн эмсэҕэлээччи бэйэтэ этэн биэрбит.

ИДьМ Алдан оройуоннааҕы отдела иһитиннэрбитинэн, РФ ХК 159 ыст. 2 ч. түөкүннээбитин иһин уорбаланааччыга холуобунай дьыала тэрилиннэ.

Полиция  сэрэтэр: хаһан да кимиэхэ да (үчүгэйдик билэр да дьонуҥ буоллун) смс-иһитиннэриинэн кэлэр куоду этимэ, өссө финансовай хампаанньа эбэтэр быраабы араҥаччылыыр уорган үлэһитинэбин диэн эрийэр итиэннэ дааннайдаргын көрдүүр буоллахтарына, кэпсэтиигин сонно тохтот.