Билиэти сакаастааһын систиэмэтигэр кэһиллии таҕыстаҕына хайдах гынабыт?

Бэҕэһээ Leonardo авиа билиэти үлэһии (бронирование) систиэмэтигэр улахан кэһиллии таҕыста. Ростех судаарыстыбаннай корпорацияҕа бэлиэтээбиттэринэн, бу төрүөтүнэн провайдерга – “Сирена Трэвел” хампаанньаҕа иһинээҕи тиэхиньиичэскэй проблема тахсыыта буолар. Ол түмүгэр сөмөлүөттэр көтүүлэрин наардалларын суһаллык көннөрөн биэрдилэр, аэропортарга бэлиэтэниигэ уочарат үөскээтэ. Бу туһунан РГ суруйар.

Маннык түгэҥҥэ айанныыр дьон тугу гыныахтааҕын кэпсиибит.

1. Аэропорт онлайн-таблотун болҕомтолоохтук кэтээҥ. Онно сөмөлүөт көтөрүн, түһэрин, хойутуурун, көһөрүн туһунун иһитиннэрии барыта баар. Систиэмэҕэ кэһиллии бу дааннайдар уларыйалларыгар дьайбат.
2. Авиахампаанньа бөлөхтөрүн социальнай ситимнэригэр, мессенджерга офицальнай ханаалларыгар сурутуҥ. Дьону таһыы кыраапыгар уларыйыылар туһунан кэмигэр иһитиннэриини таһааран иһэллэр.
3. Өскөтүн атыннык иһитиннэриини билэр кыаллыбат буоллаҕына, авиахампаанньа суһал лииньийэтигэр төлөпүөннээҥ.
4. Аэропорка аудионан биллэриини истиҥ. Өскөтүн сөмөлүөт көтүүтүн уһуннук кэтэһиннэрэр буоллахтарына, дьоҥҥо уу (икки чаастан ордук уһаатаҕына) уонна итии аһылык (түөрт чаастан ордук уһаатаҕына) көрүөхтээхтэр.
5. Малгытын харайар өҥө ирдэнэр түгэнигэр авиахампаанньа бэрэстэбиитэлигэр тиийиҥ. Көтүү атахтанар буоллаҕына босхо көрүллүөхтээх.
6. Өскөтүн көтөр бириэмэни кэтэһии аҕыс чаастан ордук уһуур түгэнигэр (түүн – алта чаас) гостиницаҕа хайдах түһэр туһунан чопчулаһыҥ. Трансферы киллэрэн туран босхо көрүллүөхтээх.
7. Сөмөлүөт көтүүтүн кыраапыгар уларыйыы тахсан айанньыт былаана улаханнык атахтанар буоллаҕына, билиэтиттэн аккаастанар бырааптаах. Төннөрүллүбэт да билиэт буоллаҕына төлөбүрүн олоччу толуйуохтаахтар (компенсировать).
8. Өскөтүн сөмөлүөт тардыллан хаалан турист үп-харчы өттүнэн ороскуотурар түгэнигэр, холобур, эрдэттэн былааннаммыт кэнсиэригэр кыайан тиийбэт буоллаҕына, Монреальскай конвенциянан (РФ манна 1999 с. киирбитэ) ороскуотун төлөттөрөр бырааптаах. Маныаха таһааччы аатыгар модьуйуу сурук суруйар уонна чиэгин барытын тиһэр.
9. Уустуктар үөскээтэхтэринэ эбэтэр айанныыр киһи бырааба кэһилиннэҕинэ Роспотребнадзор суһал лииньийэтигэр 8-800-555-49-43 төлөпүөнүнэн эрийиэн сөп. Бу туһунан РГ суруйар.