Билии эйгэтэ: Гуманитарнай чинчийии институтугар Аһаҕас аан күнэ буолан ааста

Балаҕан ыйын 18 күнүгэр Гуманитарнай чинчийии уонна хотугу аҕыйах ахсааннаах омуктар проблемаларын института тэриллибитэ 88 сылыгар аналлаах Аһаҕас аан күнэ буолан ааста. Ыалдьыттарга учуонайдар киэҥ тэрээһини бэлэмнээтилэр.

Күн бастакы аҥаарыгар институт үлэһиттэрин академическай кинигэлэрин, үлэлэрин атыылаах көрдөрүүтэ, «Эбээн оҕотун көс лааҕыра» диэн педагогика наукатын хандьыдаата Слепцов Юрий Алексеевич хаартыскаларын быыстапката уонна кэллэктиип үөрүүлээх мунньаҕа буолан ааста. Институт дириэктэрэ, и.н.д. Боякова Сардаана Ильинична бэлиэ күнүнэн эҕэрдэлээтэ. Үлэһиттэр Бочкарев В.В., т.н.х. Дьяконова М.П., т.н.х. Прокопьева П.Е., Федорова А.Р., Грязнухина М.Э. научнай-практическай бырайыактарын билиһиннэрдилэр.

Күн иккис аҥаарыгар «Экспедиция. По следам предков», «Алгыс», «Шаманы», «Погребальный обряд» уонна «Лөгөй Тойон» киэҥ араҥаҕа биллэр кинигэлэр ааптардара, историческай наука дуоктардара Розалия Иннокентьевна Бравинаны уонна Андриан Афанасьевич Борисовы кытта автограф-сессия буолла.

Институт этнографическай комплексыгар – саха балаҕаныгар уонна ураһаҕа – оскуола оҕолоругар анаан т.н.х. Николаев Егор Револьевич, Бочкарев Василий Васильевич «Учуонайдыын кэпсэтии» түһүмэххэ сахалыы ааттар уонна Улахан тылдьыт электроннай көрүҥүн туһунан кэпсээтилэр. Ол кэннэ оскуола үөрэнээччилэригэр анал тиэмэлээх квест-оонньуу ыытылынна: т.н.х Карманова Саргылаана Еремеевна — «Мин Ойуунускайым» диэн П.А. Ойуунускай 130 сылыгар, и.н.х. Архипова Алена Ивановна уонна Барабанскай Саян Андреевич – Арассыыйаҕа харчы историятыгар.

Маны сэргэ бары ыалдьыттарга институт үлэтин-хамнаһын, Саха тылын быһаарыылаах улахан тылдьытын академическай картотекатын уонна Г.П. Башарин аатынан Саха сирин академическай наукатын түмэлин билиһиннэрэр экскурсия тэрилиннэ. Тэрээһин түмүгэр и.н.х. Строгова Екатерина Алексеевна «Традиционная вышивка русских старожилов Якутии» диэн маастар-кылааһы тэрийдэ.

Аһаҕас аан күнүн тэрээһиннэригэр 200-тэн тахса киһи сырытта. М.К. Аммосов аатынан ХИФУ устудьуоннара, Дьокуускай оскуолаларын үөрэнээччилэрэ, гуманитарнай чинчийиилэри кэрэхсиир олохтоохтор, ону тэҥэ институт социальнай партнердара – «АЛРОСА» АХ, «Восток Инжиниринг» ХЭТ, Арктика уонна хотугу норуоттар дьыалаларыгар СӨ министиэристибэтэ, «Сбербанк» ПАО уо.д.а.

Семен Никонов