Билии күнүгэр Бэс күөлгэ саҥа оскуола аһыллыаҕа

150 миэстэлээх эбийиэк Горнай улууһун Бэс күөл сэлиэнньэтигэр социальнай эбийиэктэри тутуу былаанын чэрчитинэн дойду Бэрэсидьиэнэ Владимир Путин сорудаҕынан ыытыллар.

Үлэ хаамыытын билсэн баран, Ил Дархан Айсен Николаев балаҕан ыйын 1 күнүгэр саҥа дьиэҕэ үөрэх дьылын саҕалыахтаахпыт диэн соругу туруорда.

«Дойду Бэрэсидьиэнэ Владимир Владимирович Путин сорудаҕынан, бэбиэскэҕэ оскуола уонна элбэх функциональнай киин тутуллаллар. Оскуола от ыйыгар тутуллуохтаах, ол кэнниттэн оҕолор балаҕан ыйын 1 күнүттэн саҥа дьиэҕэ үөрэнэллэрин туһугар лицензиялааһын барыахтаах. Эбийиэк былырыын киллэриллиэхтээх этэ да, сааскы халаан уута мэһэйдээн, тутуу матырыйаалларын тиэйии тохтотуллубута. Онон бу сылга болдьохторун көһөрдүлэр. Билигин үлэ хаачыстыбалаахтык ыытыллар. Тыа сирин эдэр дьоно билии күнүгэр саҥа аныгы оскуолаҕа барыахтара диэн эрэнэбин», — диэтэ Айсен Николаев.

Оскуола дьиэтин тутуута РФ Бырабыыталыстыбатын бэрэссэдээтэлин солбуйааччы Юрий Трутнев салайааччылаах Уһук Илин социальнай-экэнэмиичэскэй сайдыытын боппуруостарыгар хамыыһыйа быһаарыытынан РФ Уһук Илини уонна Арктиканы сайыннарыыга министиэристибэтиттэн үбүлэнэр.

Билигин тутуллар эбийиэк 80%-на оҥоһуллар. Барыта 61 киһи үлэлиир. Наадалаах матырыйаал, ону кытта миэбэл уонна анал оборудование барыта аҕалыллыбыт. Тупсарыы үлэтэ ситэрилиннэ. Былаанынан эбийиэги туттарыы болдьоҕо атырдьах ыйын 1 күнүгэр күүтүллэр.

3 тыһыынчаттан тахса кв. миэтэрэ иэннээх икки этээстээх таас дьиэҕэ үөрэх кабинеттарыттан ураты актовай уонна успуорт саалалара, бибилэтиэкэ, остолобуой, медкабинеттар баар буолуохтара. Оскуола үөрэтэр-лабораторнай оборудованиены, көмпүүтэри, интерактивнай дуоскалары тэрийиэхтэрэ.

Санатан эттэххэ, балаҕан ыйын 1 күнүгэр 2023 с. Бэрдьигэстээххэ – Горнай улууһун киинигэр – Саха сиригэр саамай улахан тыа оскуолатын аһыллыбыта.

Хаартыскалар: Андрей Сорокин, СИА

СӨ Ил Дарханын уонна Бырабыыталыстыбатын пресс-сулууспата