Билии күнүгэр Улахан Муҥкуга «ыра санаа сөмөлүөттэрэ» көттүлэр (видео)
![](https://sakha-sire.ru/wp-content/uploads/2023/09/ulahan-4-1-1060x596.jpg)
Балаҕан ыйын 1 күнүгэр Өлүөхүмэ улууһун Улахан Муҥку сэлиэнньэтигэр Малдьаҕар начаалынай оскуола-саадыгар бастакы чуораан чугдаарда.
Сайыны быһа иһийэн турбут, өрөмүөн кэнниттэн саҥалыы көстүүлэммит оскуола-саад бүгүн хаһааҥҥытааҕар да сэргэхсийбит, киэргэйбит, сылаас тыыннаммыт. СӨ үөрэҕириитин туйгуна Михаил Габышев аатын сүгэр оскуола-саадка оҕолору уонна кинилэр төрөппүттэрин учууталлар эҕэрдэлии көрүстүлэр.
Өрөспүүбүлүкэ былааҕын өрө көтөҕүү үөрүүлээх түгэнин кэнниттэн үөрэнээччилэри бу оскуолаҕа 35 сыл начаалынай кылаас учууталынан үлэлээбит, 20 сыл дириэктэрдии сылдьар Акулина Валентиновна Шалагина уонна 2, 4 кылаастар учууталлара, I категориялаах учуутал Матрена Афанасьевна Лаврушкина эҕэрдэлээтилэр.
Улахан Муҥку нэһилиэгин баһылыга Еремей Иванович Решетников быйыл бастакы кылааска киирбит кырачааннарга үгэс буолбут бэлэхтэри туттарда, кинилэргэ элбэх билиини-көрүүнү, ситиһиилэри баҕарда.
Бу оскуола оҕолоро Малдьаҕар оскуолатыттан куорсун анньынан киэҥник биллибит биир дойдулаахтарынан: начаалынай оскуола аһыллыытыгар сүҥкэн кылаатын киллэрбит Михаил Ильич Габышевынан, Социалистическай Үлэ Дьоруойа, тутааччы Михаил Семенович Сергеевынан киэн тутталлар.
Билии күнүгэр үүнэр көлүөнэни иитэн таһаарыыга өр сылларга үтүө суобастаахтык үлэлээбит бэтэрээн учууталлар Елена Алексеевна Догоюсова (Старостина), Евдокия Кирилловна Габышева, Виталина Николаевна Габышева ааттара дорҕоонноохтук ааттанна.
Матрена Афанасьевна Билии күнүн сиэринэн, үөрэнээччилэртэн өрөспүүбүлүкэ биллиилээх дьонун төһө билэллэрин ыйытан оҕолор билиилэрин тургутан көрдө уонна кинилэр тустарынан кылгастык билиһиннэрдэ.
Быйыл 116 сылын бэлиэтиир оскуола байыаннай эпэрээссийэҕэ кыттыбыт биир дойдулаахтарынан: Андрей Габышевынан, Василий Габышевынан, Владимир Шараборинынан, Станислав Соколовынан, Илья Нутчинынан уонна дьоруойдуу өлбүт Айаал Балбаховынан киэн тутталлар.
Дьокуускай куораттан кэлэ сылдьар биир дойдулаахтара, бу оскуоланы бүтэрбит, билигин өрөспүүбүлүкэтээҕи вонкомат лиэктэрэ, ХИФУ преподаватела Виссарион Дмитриевич Балбахов балаҕан ыйын 1 күнүттэн оскуолаларга начаалынай байыаннай үөрэх киллэриллибитин этэн туран, патриоттыы тыын дьиэ кэргэнтэн, нэһилиэктэн, оскуолаттан саҕаланарын санатта.
Билии -– күн сырдыга, ыра санаа ыллыга. Быйыл начаалынай оскуола-саады бүтэрээччилэр, 4 кылаас оҕолоро «Самолетик будущего» аахсыйа чэрчитинэн, бастакы кылаас оҕолоругар бэйэлэрин баҕа санааларын кумааҕы сөмөлүөттэргэ суруйан бэлэх үүннүлэр. Бу аптаах сөмөлүөттэри кырачааннар аны 4 сылынан эрэ арыйан көрүөхтэрэ уонна улахан кылаас оҕолоро суруйан хаалларбыт баҕа санаалара төһө туолбутун билиэхтэрэ.
Оскуолаҕа, билиигэ-көрүүгэ ыҥырар чугдаарар чуорааны тыаһатар чиэс 4-с кылаас үөрэнээччитэ Марат Хастаевка уонна 1 кылаас боруогун атыллаабыт Джасмина Жулеваҕа тигистэ. Чуораан чугдаарар тыаһын кэнниттэн оҕолор кылаастарыгар киирэн, саҥа учебниктарын, кинигэлэрин билистилэр.
Быһаарыы:
2004 сыллаахха 50 миэстэлээх саҥа оскуола тутуллубута, 2007 сылтан оскуола-саадка Улахан Муҥку олохтооҕо, СӨ үөрэҕириитин туйгуна, педагогическай үлэ бэтэрээнэ, Саха судаарыстыбаннай университетын начаалынай үөрэхтээһин кафедратын доцена Михаил Ильич Габышев аата иҥэриллибитэ.
Оскуола-саад биллэр-көстөр ситиһиилэрдээх:
-«СӨ бастыҥ начаалынай оскуолата-1997 с.» өрөспүүбүлүкэтээҕи куонкурус лауреата;
«2013 сыл оскуола иннинээҕи саастаах оҕолорго бастыҥ үөрэх тэрилтэтэ» куонкурус кыайыылааҕа, «Өлүөхүмэ улууһа» муниципальнай тэриллии баһылыгын Гранын хаһаайына;
«Тыа сирин оскуолата. Үөрэхтээһин марката-2014» педагогическай дьаарбаҥка чэрчитинэн «Доруобуйа оскуолата» номинация призера;
«Тыа сирин бастыҥ уһуйаана-2016» өрөспүүбүлүкэтээҕи куонкурус кыайыылааҕа уо.д.а.
![](https://sakha-sire.ru/wp-content/uploads/2023/09/ulahan-7.jpg)
![](https://sakha-sire.ru/wp-content/uploads/2023/09/ulahan-3.jpg)
![](https://sakha-sire.ru/wp-content/uploads/2023/09/ulahan-1.jpg)
Сообщить об опечатке
Текст, который будет отправлен нашим редакторам: