Билии күнүн иннинэ бэйдиэ сылдьар ыттары тутууга үлэ күүһүрдэ

Билии күнүн иннинэ Дьокуускай куоракка бэйдиэ сылдьар ыттары тутуу үлэтэ күүһүрдэ диэн куорат дьаһалтатын пресс-сулууспатыгар иһитиннэрэллэр. Ол курдук, атырдьах ыйын 18-24 күннэригэр уопсайа 41 бэйдиэ сылдьар ыт тутуллубут. Сыл саҕаланыаҕыттан 1301 ыты туппуттар. Оттон бу нэдиэлэҕэ, атырдьах ыйын 25-28 күннэригэр 19 ыты тутан приюкка илдьибиттэр.

«Бүгүҥҥү күҥҥэ биһиэхэ ыттары тутууга биэс биригээдэ үлэлиир. Билии күнүн иннинэ үлэни күүһүрдэбит. Дача сезона бүтэн эрэринэн уулуссаларга бэйдиэ сылдьар ыт ахсаана элбиэҕэ. Күннэтэ бэтэринээрийэ управлениетын үлэһиттэрин кытта рейдэлэргэ сылдьан, ыттаах хаһаайыттарга сэрэтии үлэтин ытабыт», — диэн Владислав Слепцов иһитиннэрдэ.

Бэлиэтээн суруйдахха, бэйдиэ сылдьар ыттар куорат киин уулуссатыгар суохтарын кэриэтэ. Кинилэр ордук Бырамыысыланнай уокурук, куорат кытыы уулуссаларынан элбэхтэр.