Сайыына Румянцева хаартысканы тиксэрдэ
Билии чыпчаалын баһылаабыттар ааттара билиннэ. «Кубок знатоков наслега» түмүктэннэ!
Бу туһунан биһиэхэ Өспөхтөн бибилэтиэкэр Сайыына Румянцева иһитиннэрдэ.
Ол курдук, нэһилиэккэ билиини-көрүүнү үрдэтэр саҥа, сонун сүүрээни киллэрбит, сыл устата тиһиктээхтик, тыҥааһыннаахтык ыытыллыбыт «Кубок знатоков наслега» интеллектуальнай оонньуу түмүгэ «ИТОГИ ГОДА — 2025» тэрээһин буолбут.
—Бу күрэс — биһиги нэһилиэкпит бастакы идэлээх бибилэтиэкэрэ Мария Илларионовна Белолюбская сырдык аатын үйэтитэр уонна төрүт историябытын, култуурабытын сырдатар сүдү суолталаах тэрээһининэн буолла. Сыл устата 6 хорсун хамаанда бииртэн биир интэриэһинэй түһүмэхтэрдээх күөн күрэскэ кииристилэр, илин-кэлин түһүстүлэр. Билии муоратыгар харса суох устубут знатоктарбыт түмүктэрэ маннык буолла:
1 миэстэ — «ПОБЕДА» хамаанда (770 очукуо). Кырдьык да кыайыыга дьулуурдаахтарын көрдөрөн, оонньуу муҥутуур кыайыылаахтарынан буоллулар. Кинилэргэ 20 000 солкуобай уу харчынан бириис туттулар уонна нэһилиэк бастыҥнарын Кубогын ыллылар!
2 миэстэ — «ӨРКӨН ӨЙ» хамаанда (650 очукуо). Сытыы өйдөрүнэн, дириҥ билиилэринэн иккис бочуоттаах миэстэҕэ таҕыстылар. Кинилэр 12 000 солкуобай уу харчынан наҕараадаланнылар.
3 миэстэ — «ВЕЧНЫЕ ПИОНЕРЫ» хамаанда (640 очукуо). Кыайыыга дьулуһан, тилэх үктэһэн эрэллээхтик үһүс миэстэҕэ таҕыстылар. Кинилэргэ 8 000 солкуобай уу харчынан бириис туттарылынна.
Маны сэргэ, атын хамаандалар эмиэ олус үчүгэйдик кытыннылар. «ПАТРИОТЫ» — 630 очукуо, «САМИ» — 610 очукуо, «ЧЕРТОВА ДЮЖИНА» — 400 очукуо.
Бу курдук улахан таһымнаах тэрээһин үтүө дьон көмөтө суох табыллыа суоҕа этэ. Өспөххө бастакы идэлээх бибилэтиэкэр Мария Илларионовна Местникова (Белолюбская), өр сылларга Өспөх оскуолатыгар дириэктэринэн үлэлээбит Петр Гаврильевич Местников оҕолоругар уонна сиэннэригэр барҕа махталбытын тиэрдэбит! Эһиги улахан кылааккыт, кыайыылаах хамаандаларга анаммыт уу харчынан бириис кыттааччыларбытын көҕүлээтэ, билиигэ дьулуурдарын улаатыннарда. Ону тэҥэ, оонньуубут сүрүн бэлиэтин — көһө сылдьар Кубогы оҥорбут биһигини өрүү өйүүр «САЙДАМ» КСК улахан махтал!
Хамаандаларга барыларыгар, бириэмэтин харыстаабакка бэлэмнэммит, дойдубут историятын хасыһан үөрэппит хас биирдии киһиэхэ махталым муҥура суох. Эһиги көхтөөх кыттыыгыт — нэһилиэкпит кэскиллээҕин, билиилээх дьон элбэҕин көрдөрдө.
Билиигэ дьулуур манан тохтообот! Дьоммутун-сэргэбитин 2026 сылга буолар билиини-көрүүнү тургутар оонньууга ыҥырабыт! Хамаандаҕытын хомуйуҥ, билиигитин сытыылааҥ! Күөн күрэс эһигини күүтэр диэн иһитиннэрэбит.
Билии — күүс, сомоҕолоһуу — кыайыы!
Сайыына Румянцева хаартыскалары тиксэрдэ
Үөһээ Бүлүү улууһун Өргүөт нэһилиэгин олохтоохторо байыаннай дьайыыга сылдьар хорсун буойуттарын өйүүллэр, кинилэр үтүө көмөлөрө…
Кириһиэнньэ тымныылара ааһан, күн уһаабыта биллэн эрэр. Мантан ыла сылыйан, сырдаан, саас диэки чугаһаан иһиэхпит.…
Анаабыр улууһугар тиийэр былааннаах Кытай туристара Дьокуускай куорат мээрийэтигэр ыытыллыбыт пресс-кэмпириэнсийэҕэ кыттыыны ыллылар. Кытайга хотугу,…
Олохпут тухары илдьэ кэлбит үтүө үгэстэрбит көлүөнэттэн көлүөнэҕэ бэриллэн, утумнанан, олох сүтэн хаалбаттар. Ол иһигэр,…
Байыаннай дьайыы кыттыылаахтарын сэргэ тыылга кыайыыны уһансааччы волонтердарбыт туһунан кэпсиирбит хайаан даҕаны наада. Кинилэр биир…
Үгүс дьон төһөнөн уһуннук утуйабыт да сынньанабыт дии саныыллар. Оттон ис дьиҥэр оннук буолбатах. Хаачыстыбалаахтык…