“Билим биһиги тула” Бүтүн Арассыыйатааҕы олимпиада үөрэнээччилэри ыҥырар

Ыам ыйын 5 күнүгэр диэри “Билим биһиги тула” Бүтүн Арассыыйатааҕы олимпиада буолуоҕа.

Олимпиада Учи.ру үөрэх платформатыгар онлайн ыытыллар.

Күрэхтэһиигэ кыттарга 1-11 кылаас үөрэнээччилэрин ыҥыраллар. Ол туһугар хайаан да саайтка регистрацияланыахтарын эбэтэр Учи.ру  логинын, паролын туһанан киириэхтэрин сөп.

“Үөрэнээччилэр естественнэй билимҥэ интэриэстэрин дириҥэтэр, дьоҕурдарын көрдөрөр кыахтаннылар. Олимпиада креативнай толкуйу, логиканы, ырытар дьоҕуру сайыннарар. Бу бырайыакка кыттыы, эдэр чинчийээччилэри, учуонайдары сайыннарыыга дьоһун хардыынан буолуоҕа”, — диэтэ үөрэх министиэристибэтин сүрүннүүр исписэлииһэ Надежда Григорьева.

Олимпиада иккис сылын буолар. Ааспыт сезоҥҥа балтараа мөлүйүөн киһи кыттыбыт.

Күрэхтэһии аҕыс сорудахтан турар, ахсааҥҥа, физикаҕа, биологияҕа, экологияҕа, географияҕа, химияҕа төһө билиилээххин тургутар. Оскуола бырагырааматын таһынан тахсыбат, билиини-көрүүнү кэҥэтэр, базовай билим бириинсиптэрин чиҥэтэр кыаҕы биэрэр, диэн иһитиннэрэр Ил Дархан, бырабыыталыстыба пресс-сулууспата.