Билим күнүн академик Н.В. Черскэй 120 сыллаах үбүлүөйүн кытта тэҥҥэ тутан бэлиэтээтилэр

Арассыыйа Билимин күнүн РНА СС Саха сиринээҕи билим киинигэр бэйэлэрин идэлээх бырааһынньыктарын улахан кэлэктиип үөрэ-көтө бэлиэтээтэ.

Билим үлэһиттэрэ бу бэлиэ күннэрин академик Николай Черскэй төрөөбүтэ 120 сыллаах үбүлүөйүн кытта тэҥҥэ туппуттара кэрэхсэбиллээх. Ол курдук Н.В. Черскэй аатынан геология түмэлигэр академик 120 сыллаах үбүлүөйүгэр аналлаах экспозиция аһылынна, “Академик Н.В. Черский – выдающийся ученый, организатор науки” кинигэ быыстапката тэрилиннэ.

Николай Васильевич Черскэй уоттаах сэрии кыттыылааҕа, Социалистическай Үлэ Дьоруойа, РНА чилиэн-корреспондена, Саха сиригэр билим сайдыытыгар чиҥ акылааты уурбут, Саха сиринээҕи билим киинин өр сылларга салайбыт ураты үтүөлээх учуонай буолар. Кини олоҕун, үлэтин билим киинин генеральнай дириэктэрэ М.П. Лебедев сиһилии сырдатта, быйылгы сыллааҕы билим соруктарын туруорда.

Бырамыысыланнас уонна геология миниистирэ Максим Терещенко Ил Дархан Айсен Николаев Бэрэсидьиэн Владимир Путины кытта көрсүһүүгэ геолого-разведочнай үлэҕэ Саха сирэ пилотнай эрэгийиэн буоларыгар этии киллэрбитин санатта. Бэрэсидьиэн бу көҕүлээһини тута өйөөн, Уһук Илиҥҥи эрэгийиэннэр, Сибирдээҕи федеральнай уокурук буолан, 10 сыллаах сүҥкэн бырагырааманы оҥорбуттар. Билигин геолого-разведочнай партиялары бэлэмнээһин бара турарын тэҥэ, геологияҕа анаан ыччаты бэлэмниир сорук турар. Ол курдук орто анал үөрэх кыһаларын ХИФУ-ну кытта холбообуттар, геологияҕа 6-8 кылаастартан саҕалаан олимпиадалар ыытыллаллар, Глобальнай үөрэхтээһин киинигэр бастакы геологическай кылаас баар буолбут. Билигин дириэктэри кытта бу киин базатыгар Геологическай үөрэхтээһин киинэ аһылларыгар үлэлэһэ сылдьаллар эбит. Онон миниистир билим үлэһиттэригэр туһаайан, ыччаты бу хайысханан ыытарга көмөлөһүҥ, ыйан-кэрдэн биэриҥ диэтэ.

Арассыыйа Билимин күнүнэн ыытыллыбыт үөрүүлээх тэрээһиҥҥэ үтүө түмүктэри ситиспит үлэһиттэри наҕараадалаатылар.