Хаартыска: АЛРОСА АХ
2025 сыллаахха Саха сиригэр уһулуччулаах учуонай уонна уопсастыбаннай диэйэтэл Анатолий Попов өрөспүүбүлүкэ экэниэмикэтин уонна билимин сайдыытыгар киллэрбит кылаатын учуоттаан, кини аатын бөдөҥ алмааска иҥэрбиттэрэ. Бу ураты таас бэрэпиэссэр ситиһиитин билинии бэлиэтэ буолар. Кини үлэтэ-хамнаһа, бастыҥ-үтүө холобура саҥа көлүөнэ чинчийээччилэри уонна уһуйааччылары кынаттыыр.
2025 сыллаахха Саха сиригэр бэрэпиэссэр, экэниэмикэ билимин дуоктара, экэнэмиис-учуонай, Саха Өрөспүүбүлүкэтин Билим академиятын чилиэнэ, уопсастыбаннай диэйэтэл, Саха сиригэр үрдүк экэнэмиичэскэй үөрэхтээһини төрүттээбит Анаталий Афанасьевич Попов 90 сааһын туолбута. АЛРОСА хампаанньа былырыын атырдьах ыйыгар Айхаллааҕы байытар кэмбинээтин “Юбилейнай” туруупкатыттан көстүбүт 72,81 караат ыйааһыннаах алмааһыгар кини аатын иҥэрбитэ. Алмаас үүт-маас куопуйатын уонна сэртипикээти Анатолий Афанасьевич Поповка М.К. Аммосов аатынан ХИФУ ректора Анатолий Николаев Арассыыйа билимин күнүн көрсө, олунньу 5 күнүгэр буолбут дьоро тэрээһиҥҥэ туттарбыта.
Анатолий Афанасьевич Львовтааҕы экэниэмикэ институтун уонна М.В. Ломоносов аатынан МГУ-ну чаҕылхайдык бүтэриэҕиттэн, Саха Өрөспүүбүлүкэтигэр үрдүк экэнэмиичэскэй үөрэхтээһини төрүттүөр диэри чаҕылхай олоҕу олорон кэллэ. Кини үлэтэ-хамнаһа ситиһии энциклопедията буолар: Дьокуускайдааҕы кооперативнай техникум уһуйааччытыттан саҕалаан уонунан ахсааннаах экэниэмикэ билимин дуоктарын уонна хандьыдаатын бэлэмнээн таһаарбыт М.К. Аммосов аатынан Саха судаарыстыбаннай университетын Үп-экэниэмикэ институтун (ФЭИ) (2010 сылтан – ХИФУ) салайааччытыгар тиийэ.
“Анатолий Афанасьевич экэниэмикэ билимигэр, Үп-экэниэмикэ институтун бэрэпиэссэрдэрин-уһуйааччыларын сүүмэрдииргэ уонна институт матырыйаалынай-тэхиньиичэскэй базатын хаҥатыыга улахан кылаатын киллэрбитэ. Кини үлэтэ-хамнаһа, олоҕо-дьаһаҕа саҥа көлүөнэ чинчийээччилэргэ холобур буолар. Билигин кини салайар Экэниэмикэ түөрүйэтин кафедрата университет биир саамай кырдьаҕас кафедрата буолар.
Былырыын сэтинньигэ Москубаҕа ыытыллыбыт “Билим уонна үөрэҕирии: сайдыы тосхоло” бэрэпиэссэрдэр 2025 сыллааҕы VIII пуорумнарыгар Анатолий Афанасьевич Уһук Илин федеральнай уокуругар “Экэниэмикэ билимнэрэ” номинацияҕа “Сыл бэрэпиэссэрэ” национальнай бириэмийэни ылбыта.
Түгэни туһанан, АЛРОСА хампаанньа Анатолий Афанасьевич экэниэмикэ билимин сайдыытыгар уонна ыччаты иитиигэ-үөрэтиигэ киллэрбит уһулуччулаах кылаатын сыаналаан аатын алмааска иҥэрбитин иһин ис сүрэхпититтэн махтанабыт. Бу биһиги институппут олоҕор, өрөспүүбүлүкэ үөрэҕин уонна билимин эйгэтигэр улахан бэлиэ түгэн”, – диэн М.К. Аммосов аатынан ХИФУ ФЭИ дириэктэрэ Анна Набережная кэпсээтэ.
kyym.ru
"Пятница" теле-ханаалга Саха сириттэн эдэр асчыт Владимир Герасимов «Молодые ножи. Новая кровь 2 сезон» биэриигэ…
Владивосток куоракка боксаҕа Уһук Илин бастыыр иһин күрэхтэһии уонна чөмпүйэнээт саҕаланна. Күрэхтэһиигэ эрэгийиэннээҕи хамаандалартан кыргыттар,…
СӨ инновацияҕа, сыыппара сайдыытыгар уонна инфокоммуникационнай технологияларга миниистирэ Петр Николаев байыаннай дьайыы бэтэрээнэ, “Саха сирэ…
Саха тимирэ, тимиринэн уһаныы – бу саханы саха дэппит, тыйыс айылҕалаах хоту дойдуга биһигини киһи-хара…
Ил Дархан Айсен Николаев Москваҕа судаарыстыбаннай салайыы норуоттар икки ардыларынааҕы бастакы конгреһыгар «Цифровой капитал региона»…
Бүгүн, олунньу 12 күнүгэр, Нерюнгри оройуонугар СӨ Бырабыыталыстыбатын 2025 сыллааҕы үлэтин отчуота саҕаланар. Икки бөлөх …