Билиҥҥи кэм уһулуччулаах режиссера Сергей Потаповка аналлаах бэстибээл тэриллэр

Билиҥҥи кэм биир уһулуччулаах режиссера, СӨ ускуустубатын үтүөлээх диэйэтэлэ, тыйаатыр уонна киинэ режиссера, Арассыыйа тыйаатырдарын диэйэтэллэрин уонна  Арассыыйа Кинематографистарын сойуустарын чилиэнэ, “Кыһыл көмүс мааска” тыйаатыр национальнай бириэмийэтин лауреата Сергей Потапов 50 сааһыгар аналлаах пресс-кэмпириэнсийэ бүгүн  “Медиакииҥҥэ” буолла.

Кэмпириэнсийэҕэ Сергей Потапов  бииргэ үлэлэспит тыйаатырдарын дириэктэрдэрэ, тыйаатыр диэйэтэллэрин сойууһа, артыыстар уонна суруналыыстар кытыннылар. Кэпсэтии көҥүллүк, аһаҕастык барда.

Бастакы эҕэрдэ Сергей Потапов маҥнайгы хардыыларын оҥорбут Үүнэр көлүөнэ тыйаатырын уус-уран салайааччыта  Алексей Павловка бэрилиннэ. Алексей Прокопьевич  сөбүлүүр режиссерун видеонан эҕэрдэлээтэ уонна Сергей Потапов кинилэргэ бастакы үлэтинэн “Предчувствие” испэктээк буоларын санатта. Бу испэктээгинэн экспериментальнай тыйаатырдар норуоттар икки ардыларынааҕы бэстибээллэригэр үс номинацияҕа кыттыбыттара. Ол кэнниттэн “Властелин”, “Мамаша Кураж уонна кини оҕолоро”, “Түгэххэ” испэктээктэри туруоран,  аныгы ускуустуба бэстибээллэригэр  ситиһиилээхтик кыттыбыттара. “Сергей Потапов испэктээктэрэ биһиги тыйаатырбытыгар ситиһиилэри аҕалаллар, көрөөччү биһирэбилин ылаллар уонна тыйаатыр кириитиктэрэ сөҕөллөр-махтайаллар. Кини испэктээктэригэр мэлдьи киһи дууһата уонна хомолтото арыллар. Сергей Потапов бэстибээлэ биһиги өрөспүүбүлүкэбит култууратын олоҕор биир чаҕылхай түгэнинэн буоллун”, — диэн эҕэрдэтин тириэртэ.

СӨ култуураҕа уонна духуобунай сайдыыга миниистирэ Афанасий Ноев режиссер Сергей Потапов дьиҥ сахалыы көрүүлээҕин, дьикти, ураты дьоҕурдааҕын бэлиэтээтэ.

“Сергей тыйаатыр бары хайысхатыгар талааннаахтык үлэлиир режиссер. Ол курдук, кини маассабай-театральнай туруорууларга да, дьоҕус да испэктээктэргэ уонна киинэлэргэ үлэлиир. Ону таһынан биһиги тыйаатырдардыбытыгар эрэ буолбакка, аан дойду тыйаатырдарыгар тиийэ үлэлиир режиссер буолар. Сергей Станиславович классическай театральнай ускуустуба оскуолатын барбыт, ону бүтэрбит киһи. Кини үөрэҕин бүтэрээт да, “Кыһыл көмүс маасканы” ылбыта мээнэҕэ буолбатах. Андрей Борисов эмиэ бэйэтин бириэмэтигэр дипломнай испэктээгинэн Судаарыстыбаннай бириэмийэни ылбытын билэбит”, — диэн астына бэлиэтээтэ.

Б.Ойуунускай аатынан Саха тыйаатырын дириэктэрэ Петр Макаров:

-Сергей Потапов тыйаатырга кэлээт да, 2004 с. “Макбет” диэн улахан испэктээги туруорбута. Онно саамай улахан бириэмийэни “Кыһыл көмүс маасканы” ылан турардаахпыт. Итинтэн саҕалаан, режиссер быһыытынан аатын ааттатан барбыта. Кини Саха тыйаатыра эрэ буолбакка, Арассыыйа эрэгийиэннэрэ бары билинэр, билэр киһилэрэ буолла. Онон Арассыыйа эрэгийиэннэригэр олус элбэх испэктээги,  уопсайа 100-тэн тахса испэктээги туруорда. Кини туох баар хайысхаҕа барытыгар талааннаахтых үлэлиир, арыллар режиссербутунан  буолар. Саха тыйаатырын репертуарыгар бэйэтэ суоллаах-иистээх, ураты  буочардаах испэктээктэрэ сүрүн миэстэни ылаллар. Сергей режиссер быһыытынан көрөөччүнү толкуйдатар үлэлэрдээх, Онон кини биир уратытынан көрөөччүнү испэктээк кэнниттэн хайаан да толкуйдатара буолар. Саха тыйаатыра эрэ буолбакка, мусукаалынай да, драматическай да, үҥкүү да тыйаатыра буоллун, Цииркэ да буоллун,  кини көрөөччүгэ хайаан да тугу эрэ этэрдээх буолар”, — диэн көрөөччүлэри бу күннэргэ ыытыллар бэстибээл кэмигэр өрөспүүбүлүкэ 4 тыйаатырыгар Сергей Потапов үлэлэрин көрө-истэ, сэргии, сэҥээрэ  кэлэллэригэр ыҥырда.

Ону таһынан кэмпириэнсийэҕэ Хотугу цииркэ дириэктэрэ Сергей Расторгуев, С.Зверев аатынан Үҥкүү тыйаатырын дириэктэрэ Саргылаана Борисова,  Эстрада тыйаатырыттан Павел Семенов уо.д.а. Сергей Потаповы кытары саҥаттан-саҥа үлэлэрин туһунан кэпсээтилэр, махтаннылар.

Биир идэлээхтэрэ уонна биир санаалаахтара Сергей Потапов билигин саамай үлэлиир, айар-тутар мындыр сааһыгар кэлбитин, онон өссө да элбэх кэрэхсэбиллээх үлэни күүтэллэрин туһунан эттилэр. Чахчыта да, Сергей Потапов Мариинскай тыйаатырга “Тени забытых предков” испэктээги туруорарыгар кэпсэтиилэр ыытыллаллар, ону сэргэ Саҥа дьыл кэнниттэн Саха тыйаатырыгар Акира Куросава киинэтинэн “Сэттэ самурай” испэктээги туруоруу торумнанар.

Сергей Потапов 50 сааһыгар аналлаах бэстибээл бырагыраамата:

Ахсынньы 4-12 күннэрэ: “Лена” киинэ тыйаатырыгар С.Потапов киинэлэрин көрдөрүү:

Ахсынньы 11 күнүгэр 19.00 чаастан: Сиэн Өкөр “Һуума” испэктээгэ (КМНС тыйаатырыгар) ;

Ахсынньы 12 күнүгэр 18.00 чаастан: Утум Захаров “Маһары. Ыраахтааҕыга айан” испэктээгэ (Саха тыйаатырыгар);

Ахсынньы 12 (19.00 ч) уонна 14 (15.00 ч)  күннэригэр: А.Амбросьев “Киристэпиэл” (Эстрада тыйаатырыгар);

Ахсынньы 13 күнүгэр 18.00 чаастан: С.Зверев “Кынчарҕаннаах харахтаах, кырыылаах сутуруктаах Кыыс Кыыдаан бухатыыр” испэктээгэ (Үҥкүү тыйаатырыгар);

Ахсынньы 14 күнүгэр 17.00 чаастан: М.Булгаков “Маастар уонна Маргарита” испэктээгэ (Саха тыйаатырыгар).