Билиҥҥи кэмҥэ саамай тоҕоостоох маастар-кылаастар буола тураллар

“Эргэ куорат” түөлбэҕэ бүгүн олохтоох оҥоһугунан быыстапка-дьаарбаҥка, ыһыаҕы көрсө маастар-кылаас арааһа буола турар.

Тустаах тэрээһин ыам ыйын 29-31 күннэригэр Дьокуускайга “Уһук Илиҥҥэ оҥоһулунна: айар үлэттэн – экэниэмикэҕэ” норуоттар икки ардыларынааҕы креативнай индустрия II пуорумун иитинэн ыытыллар.

Ол курдук, тэлгэһэ тас өттүгэр икки эрээтинэн олохтоох, тарбахтарыгар талааннаах маастардар тикпит сахалыы таҥастара, киэргэллэрэ, дьиэни киэргэтэр хартыыналара, араас оҥоһуктара кэчигирэспиттэр. Оннооҕор биир-икки саастаах кырачаан кыргыттарга аналлаах сахалыы ырбаахылар кытта бааллар.

Биир идэлээхпит, тарбаҕар талаана кэлин киэҥник арыллан эрэр Василий Пак хомуйан оҥорбут “Уран талба талааннахтар” кинигэтигэр букатын 47 араас маастар-кылаас түмүллүбүт. Үчүгэйэ диэн, аныгы сиэринэн куйаар кодтаах буолан киһи төһө баҕарар видеотын көрөн баҕарбыт оҥоһугун сыта-тура, бэйэтэ илиитинэн айан таһаарар кыахтаах. Кинигэ бу дьаарбаҥка-быыстапкаҕа атыылана турар.

Иһирдьэ аастахха хас даҕаны Далбар Хотун — маастар бэйэтин сатабылын оҕотуттан кырдьаҕаһыгар тиийэ үллэстэр. Ыам ыйын сиккиэр салгыныгар, “Эргэ куорат” ураты эйгэтигэр кыргыттар, дьахталлар илиилэригэр инньэ тутан, таҥас кырыйан, тимири эллээн, сиэли кырыйан ыһыахха анаан жабо, түөскэ, баттахха, илиигэ иилинэр киэргэл, олбох, дэйбиир, уо.д.а. сахалыы оҥоһугу бэлэмнэнэ олороллор.    Ийэлэр оннооҕор уонча саастаах, сынньалаҥҥа олорор кыргыттарын сиэтэн аҕалан баттах киэргэлин, түөскэ иилинэр киэргэллэр маастар-кылаастарыгар сырытыннараллар. Бэйэлэрэ аттыларыгар олбох тиктэллэр, ытарҕа оҥостоллор.

“Симэх” галерея мэтэдииһэ Тамара Жиркова: “Уостаах үтүлүктэн, дьабака бэргэһэттэн саҕалаан оноолоох сонугар тиийэ саха таҥаһыгар кууруһунан маастар-кылааһы ыытабын. Элбэхтик иистэнэбит, араас тэрээһиннэргэ кыттабыт. Бүгүҥҥү тэрээһиҥҥэ үс үөрэнээччим бэйэбин кытта маастар-кылаас ыыталлар.

Мин бүгүн олбоҕу тигиигэ маастар-кылаас биэрэбин. Олбох ыһыахха да, дьиэҕэ-уокка даҕаны олус туһалаах. Ойуута – харысхал, онон өрүү харыстыыр аналлаах. Сантиметрыгар тиийэ ыйыллыбыт, өҥнөөх бэлэм уруһуйун эмиэ биэрэн ыытабын. Онон бүгүн үөрэммиттэр хаһан баҕарар маны үтүгүннэрэн кэлин араас олбоҕу тиктэр кыахтаахтар” – диэн кэпсиир.

Ити курдук, Дьокуускай куорат кэрэ аҥардара  удамыр сыаналаах маасар-кылааһы ылан, бэлэм таҥаһы-сабы, киэргэли атыылаһан номнуо ыһыахха бэлэмнэнэллэр.