Билиҥҥи олох оҕолор харахтарынан

Бэҕэһээ Дьокуускайга «Азия» киинэ тыйаатырыгар Н.О. Кривошапкин аатынан 5 №-дээх оскуола медиа-студиятын киинэлэрин премьернай көрдөрүүтэ буолла. Көрөөччүлэр сыанабылларыгар икки кылгас киинэ турда: 10 «В» кылаас режиссера Яна Бурнашева «Цена желаний» уонна 11 «В» кылаас режиссера Александра Дьячковская «Экзамен на дружбу» диэн үлэлэрэ.

Режиссураттан, сценарийтан, устуу хамаандатыттан, тыаһыттан-ууһуттан, сырдатыыттан, таҥааһынтан, артыыс састаабыттан саҕалаан, үлэ бүтүннүү 7-тэн 11-с кылаас оҕолорун күүстэринэн оҥоһуллубут. Биллэн турар, киинэлэр саха киинэтинэн дьарыктанар, уонунан ааҕыллар бырайыактардаах идэтийбит дьон уһуйбуттар.

Бастакы киинэҕэ бары көмөлөөн оҥорбут буоллахтарына, иккис киинэни уолаттар үөрэнэн, сүрүннээн бэйэлэрэ устубуттар.

«Шанхай» киинэ саала тобус-толору этэ, көрдөрүү кэмигэр биир да киһи тахсан барбатаҕа… Киинэлэр тустарынан тугу этиэххэ сөбүй? Оҕолор устубут киинэлэригэр сырыттахха, кинилэртэн элбэҕи күүппэккин. Ол эрээри бу икки кылгас киинэлэр ураты тыыннаахтарын, хаачыстыбалаахтык уһуллубуттарын бэлиэтиир тоҕоостоох. Бэйэ устуута эбэтэр судургу диир кыаллыбат. Үчүгэй сценарийдаах, бөҕө режиссуралаах, операторскай үлэлээх, артыыстар састааптара бэркэ таҥыллыбыт.

Биллэн турар, бэйэтин эйгэтин бэркэ билэр киинэ кириитигэ ханна эмит кыра сыыһаны, холобур, сырдык тиийбэтин, балаһыанньа драматичнайа суоҕун булуоҕа. Ол эрээри боростуой киһи көрөрүгэр олус табыллыбыт диэххэ сөп.

Ону таһынан мин көрүүбэр, бу кырдьык аныгы оскуола оҕолоро биһиги билиҥҥи олохпут кырдьыгын хайдах көрөллөрүнэн, олох кыһалҕатыгар сыһыаннарын, ол иһигэр ийэ ыарытыйыытын, идэ талыытын, үөрэххэ сыһыаны, БКЭ-ни кытары сибээстээх психологическай уонна эмоциональнай кыһалҕалары саҥалыы тыыннаан көрдөрөллөр. Ону биһиги, улахан дьон, үгүстүк өйдөөбөппүт…

Биир төрөппүт эппитин курдук, 5-с оскуолаҕа бүгүн эбии үөрэхтээһиҥҥэ барар «хамсааһынтан» олус сөхтүбүт, кини дириэктэр Алексей Климентьевичкэ, медиа-студия салайааччытыгар Андрей Дьяконовка махталын тириэртэ, оскуола оҕолоро кистэнэ сылдьыбыт талааннарын арыйарыгар уонна харахтара уоттанарыгар кыаҕы биэрбиттэригэр махтанна.

«Бу оскуола оҕолорун күүстэринэн, педагогтар, төрөппүттэр, киинэ индустриятын профессионалларын уонна «Амма продакшн» уонна «Сахафильм» киинэ хампаанньаларын өйөбүллэринэн оҥоһуллубут медиа-студия бастакы уус-уран киинэлэрэ. Бу бырайыак оҕолор идэлэрин талыыларыгар, киинэни оҥорууну кытта билсиһиилэригэр, устууларыгар дьиҥнээх улахан практиканан буолла. Биһиги киинэлэрбит профессиональнай киинэҕэ төһө кыалларынан чугас буолалларыгар кыһаллыбыппыт. Оҕолорго бу үйэ-саас тухары хаалар уопут буолар», — диэн медиа-студия уонна «Тускул» медиа-холдинг салайааччыта Андрей Дьяконов бэлиэтээтэ.

Андрей Дьяконов этэринэн, бу киинэлэр МОСТ – киинэни, афишаны, маркетплейсы, стримины уонна атын сервистэри түмэр супер-аппка киириэхтэрэ, онно кинилэри Саха киинэтин салаатыгар көрүөххэ сөп. Киинэлэр араас тематическай киинэ бэстибээллэригэр кыттыахтара, ону таһынан, кинилэр хас да киинэни эбии устан, балтараа чаастаах альманах оҥорон, эрэгийиэннээҕи прокакка тахсарга холонуохтарын салайааччы эттэ.