«Муус Устар»: Биллэр пранк-суруналыыстары кытта көрүстүлэр

Арассыыйа аатырбыт пранк-суруналыыстара Владимир Кузнецов (Вован) уонна Алексей Столяров (Лексус) «Муус Устар» бэстибээл спикер-ыалдьыттарынан буоллулар.

“Пранк” социальнай ситимнэргэ, төлөпүөнүнэн элэктээһин 2000 сыллар саҕаланыыларыгар тэнийбитэ. Бэстибээлгэ билиҥҥи уустук кэмҥэ куйаар ситиминэн үлэни ыытыыга ууруллар ирдэбиллэри учуоттааһыны эмиэ болҕомто киинигэр ууран бу көрсүһүүнү тэрийээччилэр анаан былааҥҥа киллэрбиттэрэ. Тэрээһиҥҥэ блогердар, суруналыыстар, үрдүкү кылаас оҕолоро хото муһуннулар.

Аатырбыт пранк-суруналыыстар көрсүһүүгэ кэлбит биир интэриэстээх дьону кутта атах тэпсэн олорон, социальнай-бэлитиичэскэй боппуруостары, геополитика, “информационнай гигиена” дэнэр  куттал суох буолуутун боппуруостарын сиһилии ырыттылар, дьүүллэстилэр.

“Биһиги урукку кэмҥэ күлүү-элэк курдук аан дойду бэлиитиктэригэр уонна сулустарыгар тиийэ тахсан кэпсэтэр этибит. Бастаан утаа омук сиригэр аатырбыт бэлиитиктэри, сулустары кытта төлөпүөнүнэн тахсан, күлүү-элэк ис хоһоонноох кэпсэтэр этибит. Ити 2004-2007 сылларга. Ол курдук, Гарри Поттер ааптарын кытта тиийэ кэпсэтэн турабыт. Ол кэпсэтиилэри кэлин анааран көрдөххө, сулуһу бэйэтин кытта кэпсэтэрдээҕэр, кинини тулалыыр продюсердары кытта кэпсэтии уустук, өр барар. Өссө сулуһу кытта кэпсэтэргэ харчы көрдүүллэр. Аахсыйа оҥорон сыанатын түһэрэбит диэччилэр. Билигин аан дойдуга балаһыанньа уларыйан, омук сирдэрин кытта кэпсэтэрбит уурайбыта, ураты суолталаах араас тиэмэлэри ырытабыт.

Бастатан туран, геополитика тиэмэтэ. Элбэх киһи ону сиһилии сирийэн өйдөөбөт уонна билбэт. Биһиги сорукпут – туох буола турарын боростуой, өйдөнүмтүө тылынан быһаарыы.  Соторутааҥҥа диэри бу өрүккэ болҕомто соччо ууруллубат этэ. Киһини араас сымыйаҕа киллэрэр ньыма күн-түүн уларыйан, күннээҕи олох көстүүлэригэр сөп түбэһиннэрэн иһэр схемалартан сылтаан, дьон мөлүйүөнүнэн харчытын биир түгэн иһигэр көрөн туран матар кэмэ кэллэ. Биһиги дьоҥҥо туһалаах өрүттэри кэпсээн, сүбэлээн биэрэбит», — диэн бэлиэтээтэ Владимир Кузнецов-Вован. Суруналыыстар албыннааһын уонна кибер-куттал суох буолуутун тиэмэтигэр ураты болҕомтону уурдулар. Кинилэр этэллэринэн, билигин бу хас биирдии  киһиэхэ куттал суоһаабатын боппуруоһа сүрүн тиэмэнэн буолла.

Алексей Столяров (Лексус) “маннык боппуруостарга олохторун аҥарын сыыппара эйгэтигэр атаарар ыччаты кытта үлэ ордук суолталаах. Онон бу “Муус устар” курдук ыччаты кытта үлэлиир тэрээһиннэри тэрийии – кэм ирдэбилэ”, — диэн бэлиэтээтэ. Москваттан кэлбит ыалдьыттар бэстибээл кэнсиэпсийэтин кытта эрдэттэн билсибиттэр, олус сөптөөх хайысхалаах үлэ ыытыллар эбит диэн тылларын-өстөрүн анаан  тиэрдээри тэрээһиҥҥэ анаан кытта кэлбиттэр.

Пранк-суруналыыстар Өлүөнэ очуостарыгар сылдьан алгыс ылбыттарын астына кэпсээтилэр. “Биһиги курдук эйгэҕэ үлэлиир суруналыыстарга Ийэ айылҕаны кытта алтыһыы, ыраастаныы наада. Онон Саха сиригэр сылдьан ыраастанан, харысхал ылан баран эрэбит. “Үлэ кыбаарталыгар” сылдьан экскурсиялаан баран, ыччат сайдыытыгар олус наадалаах усулуобуйа тэриллибитин олус сөҕө көрдүбүт. Ол да иһин сахалар сыыппара эйгэтин олохтоохтук баһылаабыт эбиттэр диэн санааҕа кэллибит”, — диэн санааларын үллэһиннилэр.