Биллэр судаарыстыбаннай диэйэтэл Иван Спиридонов олохтон туораата

Балаҕан ыйын 13 күнүгэр «Бочуот знага», «Норуоттар доҕордоһуулара», «Хотугу сулус» орденнар кавалера, РФ култууратын үтүөлээх үлэһитэ, СӨ норуодунай хаһаайыстыбатын үтүөлээх үлэһитэ Иван Петрович Спиридонов 93 сааһыгар олохтон туораата.

«Иван Петрович Саха сирин олохтоохторугар Дьокуускайдааҕы эт кэмбинээтин уонна «Сардаана» фабриканы кытта ситимнээх. Кини бу тэрилтэлэр сайдыыларыгар олоҕун анаабыта. Иван Петрович дьону түмэри сатыыра, сатабыллаах салайааччы, муударай настаабынньык этэ. Иван Петрович чугас дьонугар, аймахтарыгар дириҥ кутурҕаммын тиэрдэбин», — диэн Ил Дархан Айсен Николаев телеграм-ханаалыгар иһитиннэрдэ.