Биллибэт саллаат күнүн бэлиэтээтибит

Ахсынньы 3 күнэ — хааннаах кыргыһыыга охтубут, ааттара биллибэт саллааттары барыларын ахтан-санаан, кэриэстээн ааһар күммүт.

Аҕа дойду Улуу сэриитигэр төһөлөөх аҕаларбыт, убайдарбыт, таайдарбыт кыргыһыы хонуутугар аата-суола суох охтубуттара буолуой…

Биһиги көлүөнэ көҥүл дьоллоох олохпут туһугар, сэрии толоонугар дьоруойдуу охсуспут-охтубут үтүө-мааны дьоммутун кэриэстээн, Кэбээйи улууһун Куокуй нэһилиэгин «Угуйаан» култуура дьиэтин үлэһиттэрэ «Обелиск» пааматынньыкка сибэкки дьөрбөтүн уурдулар.

Оскуола иһинэн ыытыллыбыт линиэйкэҕэ иитии үлэтигэр дириэктэр солбуйааччыта Мария Аркадьевна Гуляева бу күн суолтатын оҕолорго билиһиннэрдэ. Биир мүнүүтэ чуумпуран,  сүгүрүйэн ыллыбыт. Кылаастарынан бу күҥҥэ аналлаах уруоктар ыытылыннылар. Ася Ивановна Яковлева тэрээһиннээх «Кыһыл гвоздика» сибэккини оҥорууга маастар кылаас ыытылынна.

Полина Жергина,

Кэбээйи улууһун Куокуй нэһилиэгэ.