Биллиилээх артыыс, ырыаһыт уонна продюсер — Владимир Путин итэҕэллээх киһитэ

«Сахафильм» тэрилтэ салайааччыта, ырыаһыт, артыыс Алексей Егоров Саха сиригэр Владимир Путин итэҕэллээх киһитинэн буолла. 

Маны таһынан, эрэгийиэммититтэн Владимир Путин итэҕэллээх дьонунан ДНӨ тирэх пуунун волонтера Марина Бахилина  уонна уопсастыбаннай диэйэтэл, Афганистан сэриитин бэтэрээнэ Валерий Лютай буолаллар. Киин быыбардыыр кэмитиэт уопсайа сүүстэн тахса Владимир Путин итэҕэллээх дьонун регистрациялаата.

Алексей Егоров-Өркөн Чурапчы улууһугар күн сирин көрбүтэ.  2002 сыллаахха М.С. Щепкин аатынан үрдүкү театральнай училищены бүтэрбитэ. 2009 сыллаахха тыйаатыр ускуустубатын менеджерин, 2015 сыллаахха РФ Бэрэсидьиэнин иһинэн «Култуура эйгэтин салайыы» идэлэрин баһылаабыта. 2015-2018 сылларга Эстрада тыйаатырын дириэктэринэн үлэлээбитэ. Кини салайар кэмигэр тэрилтэтэ сонун сүүрээннэри олоххо киллэрэн, иккис тыынын ылбыта.  2018-2023 сылларга «Лена» киинэ тыйаатырын дириэктэринэн үлэлээбитэ. 2023 сылтан «Сахафильм» тэрилтэ саайааччытынан ситиһиилээхтик үлэлиир.