Биллиилээх тириэньэр Дмитрий Коркин төрөөбүтэ 95 сылыгар аналлаах тэрээһиннэри ыытыахтара

Бу сыл балаҕан ыйыгар көҥүл тустуу үтүөлээх тириэньэрэ Дмитрий Петрович Коркин төрөөбүтэ 95 сылын туолар. Бэлиэ күнүгэр сөп түбэһиннэрэн успуорт, култуура уонна үөрэх тэрээһиннэрин ыытыахтара. Бэлэмнэнии хаамыытын Чурапчыга буолбут тэрийэр кэмитиэт мунньаҕар  Бырабыыталыстыба бэрэссэдээтэлэ Андрей Тарасенко билистэ.  

Физическэй култуура уонна успуорт миниистирин солбуйааччы Гаврил Мохначевскай иһитиннэрбитинэн, Дьокуускайга уонна Чурапчы улууһугар ыытыллыахтаах тэрээһиннэр былааннарыгар 20 тэрээһин киирбит.

Андрей Тарасенко, Физическэй култуура уонна успуорт министиэристибэтэ Үөрэх уонна билим министиэристибэтин кытта Дмитрий Коркин төрөөбүтэ 95 сылынан биир кэмнээх истипиэндьийэ боппуруоһун көрөллөрүгэр сорудахтаата. Истипиэндьийэ успуорка үрдүк көрдөрүүлээх уонна үөрэхтэригэр ситиһиилээх орто анал үөрэх тэрилтэлэрин устудьуоннарыгар ананыан сөп.

“Дмитрий Петрович  Коркин – Саха сирин тас өттүгэр тиийэ биллэр, ытыктанар биллиилээх тириэньэр. Кини саҥаны киллэрээччи педагог этэ, өрөспүүбүлүкэни аан дойдуга тиийэ суон сураҕырдыбыт чөмпүйүөннэри иитэн таһаарбыта. 2023 сыл Педагог уонна уһуйааччы сыла буоларын быһыытынан, бары үбүлүөйдээх тэрээһиннэр сүрүн соруктарынан, кини ураты устуоруйатын уонна уопутун эдэр көлүөнэҕэ киэҥник сырдатыы буолар”, — диэн Бырабыыталыстыба бэрэссэдээтэлэ бэлиэтээтэ.

Балаҕан ыйыгар Дьокуускайга Дмитрий Коркин кэриэһигэр көҥүл тустууга күрэхтэһии ыытыллыаҕа, манна 15 дойдуттан бөҕөстөр кытталлара былааннанар. Уолаттарга туспа турнир тэрийиэхтэрэ.

Көҥүл тустуу сайдыытын кэскилин балаҕан ыйыгар Дьокуускайга буолар научнай-практическай кэмпириэнсийэҕэ кэпсэтиэхтэрэ. Ону тэҥэ, оҕолорго анаан тиэмэлэринэн уруоктары уонна куонкурустары былаанныыллар.

Быйыл улуу тириэньэр олоҕун уонна үлэтин туһунан киинэни устан саҕалыахтара. Билигин матырыйаалын, интервьюлары хомуйа сылдьаллар. Киинэни устарга айар бөлөх кэлэктиибэ “СӨ култуураны сайыннарыы” судаарыстыбаннай бырагырааманан 5 мөл. солк. кээмэйдээх граны ылбыт.

Чурапчы сэлиэнньэтигэр суолу-ииһи, эбийиэктэри тупсаран оҥорууну хабан туран, инфраструктураны өрөмүөннүөхтэрэ.

Санатан эттэххэ, үтүөлээх тириэньэр Дмитрий Петрович Коркин төрөөбүтэ 95 сылыгар аналлаах тэрийэр  кэмитиэт СӨ Ил Дархана Айсен Николаев дьаһалынан 2021 сыллаахха бигэргэммитэ.

Дмитрий Петрович Коркин – Саха АССР, РСФСР, ССРС үтүөлээх тириэньэрэ, саҥаны киллэрэр педагог, көҥүл тустууга саха оскуолатын төрүттээччи. Олимпиада икки чөмпүйүөнүн, призерун, аан дойду уонча чөмпүйүөнүн, ССРС успуордун үтүөлээх маастардарын, ССРС 160-тан тахса маастарын иитэн таһаарбыта.

 

Ил Дархан уонна Бырабыыталыстыба пресс-сулууспата.