Билсэртэн аккаастаммыт кыыс төлөпүөнүн алдьаппыт киһиэхэ холуобунай дьыала тэрилиннэ

ИДьМ сулууспатын “Дьокуускайдааҕы” 3-с №-дээх полиция отделын дьуһуурунай чааһыгар биир кыыс билбэт эр киһитэ 70000 солкуобай сыаналаах смартфонун алдьаппытын туһунан сайабылыанньа киллэрбит.

Бэрэбиэркэ түмүгүнэн учаастактааҕы полиция боломуочунайа уорбаланааччы кимин уонна ханна баарын быһаарбыт. Уорбаланааччы 39 саастаах эр киһи эбит. Бу туһунан СӨ Өрөспүүбүлүкэтин ИДьМ пресс-сулууспата иһитиннэрэр.

Түүҥҥү баар таһыгар эр киһи кыыһы кытары билсиһэ сатаабыт, ону кыыс аккаастаабыт. Кинилэр икки ардыларыгар этиһии тахсыбыт, ону эмсэҕэлээбит кыыс эр киһини төлөпүөнүнэн устубут. Ол кэмҥэ эр киһи киниттэн смартфонун былдьаан ылан, сиргэ быраҕан алдьаппыт уонна куотан хаалбыт.

РФ Холуобунай кодексын 167 ыстатыйатын 1 чааһынан (Атын киһи баайын-дуолун соруйан суох оҥоруу эбэтэр алдьатыы) холуобунай дьыала тэриллибит.