Бильярд күрэҕэ Данил Кычкин төрөөбүтэ 80 сылыгар ананна

Сэтинньи 23 күнүгэр Суотту нэһилиэгэр Хоноҕордооҕу «Түһүлгэ» сынньалаҥ киинигэр Саха Өрөспүүбүлүкэтин култууратын туйгуна, өр сылларга култуура эйгэтигэр таһаарыылаахтык үлэлээбит, дэгиттэр талааннаах, ураты дьоҕурдаах спортсмен, булчут, баянист, ырыаһыт Данил Константинович Кычкин төрөөбүтэ 80 сылыгар анаан, эр дьоҥҥо бастыыр иһин улуустааҕы улахан бильярд күрэҕэ бэрт сэргэхтик ыытылынна.

Бу күн сарсыардаттан улууспут нэһилиэктэриттэн уопсайа 52 киһи кэлэн сырдык, киэҥ, сылаас кулууп дьиэтигэр бары бииргэ муһуннулар.
Кэлбит ыалдьыттары, күрэх оонньооччуларын сахалыы сиэринэн арчылааһын ыытылынна. Бу күрэҕи тэрийээччи, көҕүлээччи нэһилиэк баһылыга Василий Иннокентьевич Иванов эҕэрдэлээн туран, сүрүн судьуйанан ананан, иилээн-саҕалаан ыытта.
Улахан оонньууга тэҥинэн үс бильярд остуола турбута хас биирдии кэлбит оонньооччуну үөртэ, өрө көтөҕүллэн туран бастыыр иһин биир тэҥинэн илин-кэлин түһүстүлэр.
Бүгүҥҥү күрэх динамичнай пирамида (невка) оонньуу быраабылатынан ыытылынна, ким кими кытта киирсэрэ тута улахан экраҥҥа көстө турара күрэх таһымын үрдэттэ, кэнники бильярд оонньуута күүскэ сайдыбытын көрдөрөр. Тыҥааһыннаах киирсиилэр түмүктэринэн финальнай оонньууга үһүс бириистээх миэстэни ылла: А.Д.Скороходкин (Майаҕас), иккис бириистээх миэстэни М.М.Макеев (Бороҕон) уонна сатабыллаах оонньууну көрдөрөн, күрэх муҥутуур кыайыылааҕын аатын А.Н.Турантаев (Бороҕон) ылыан ылла. Киниэхэ үөрүүлээх быһыыга-майгыга Данил Константинович Кычкин төрөппүт оҕолоро уонна кэргэнэ, үлэ бэтэрээнэ Федора Ивановна анаан туруорбут сүрүн бириистэрин — сыаналаах тэлэбиисэри дохсун ытыс тыаһынан туттардылар.
Маны сэргэ үчүгэй оонньууну көрдөрбүт кыттааччыларга анал ааттары, бириистэри туттардылар. Бильярды кэрэхсээн оонньуур соҕотох кэрэ аҥаарга, Кэптэниттэн сылдьар А.Д.Татариноваҕа анал бирииһи туттардылар.

Эдэр ыччаттарбыт көхтөөх кыттыыны ылан киэҥ биһирэбили ыллылар. Күрэх кыттыылаахтарыгар анаан, Д.К.Кычкин туһунан быыстапка турда, олоҕун-үлэтин кэпсиир слайда көһүннэ.
Күрэх былаһын тухары итии, минньигэс астаах буфет тиһигин быспакка үлэлээтэ.
Нэһилиэкпит тэрилтэлэрэ,урбаанньыттара дьоһун бириистэри туруоран, күрэхтэһиини сытыырхаттылар. Кэлбит оонньооччулар дуоһуйа оонньоон, атын дьону көрөн үөрэнэн, үөрэн, махтанан бардылар. Элбэх киһи бу көрүҥҥэ кыттыыта анаан дьарыгырар оонньооччулар нэһилиэктэргэ дьон сэҥээриитин ылара, күүһүрэн иһэрин көрдөрөр.
Үтүөнү үксэтэ, кэрэни кэрэхсии биир санаанан кэлбиккитигэр бары кыттааччыларга, онньооччуларга, тэрийээччилэргэ ис сүрэхтэн истиҥ махталбытын тиэрдэбит!
Бу успуорт көрүҥэр тэтими ыһыктыбакка, чөл олоҕу тутуһан, бары көлүөнэ ситимэ салҕана турдун!

Валентина БУБЯКИНА