Бильярдка оҕотуттан оҕонньоругар тиийэ күрэхтэстилэр

Бильярды таптааччылар ахсааннара элбээн иһэрэ бэлиэтэнэр. Күрэхтэһиигэ оҕотуттан ытык кырдьаҕаһыгар тиийэ, оннооҕор Москваттан кытары кэлэн күөн көрсүбүттэр. Киирсии сытыы буолбута көрөөччүлэри сөхтөрбүт.

Дьокуускайга ыытыллыбыт быйылгы чөмпүйэнээккэ 67 киһи бастыҥ спортсмен аатын сүгэр иһин киирсибит. Саамай эдэр оонньооччу 13 саастаах оҕо, саамай кырдьаҕас спортсмен 79-таах.

Турнир түөрт категориянан барбыт. Ол курдук, дьахталлар, эр дьоннор, бэтэрээннэр бөлөхтөрө (50–59 саастаахтарга уонна 60+).

Ох курдук оҥостон, кустук курдук куоһанан, эрдэттэн бэлэмнэнэн кэлбит спортсменнар эрбии тииһин курдук эгил-тэгил эриспиттэр. Тардыалаһыылаах, илин-кэлин түсүһүүлээх күрэс кэнниттэн түмүк маннык буолбут.

Дьахталларга: 

Кыайыылааҕынан Москваттан кэлэ сылдьар ыалдьыт Алла Колеватых ылбыт. Иккискэ Александра Жедонова, үһүскэ Алия Ануфриева уонна Оксана Ионова тахсыбыттар.

Эр дьоҥҥо: 

Успуорт маастара Алексей Эверстов чөмпүйүөннээбит. Иккиһи Эльбек Бальжинимаев, үсүһү Андрей Сафронов (кырата) уонна Михаил Оконешников ылбыттар.

Бэтэрээннэргэ (50–59 саастаахтарга):

Анатолий Козлов бастыҥынан буолбут. Иккискэ Айаал Тимофеев, үһүс бириистээх миэстэҕэ Иван Лазарев уонна Андрей Сафронов (улахана) тиксибиттэр.

60+ саастаахтарга:

Кыайыы өрөгөйө — Петр Ивановка. Иккис миэстэҕэ Сергей Боеков, үһүскэ Дмитрий Максимов уонна Юрий Федоров тахсаннар үөрбүттэр.

Бильярды таптааччылар аныгыскы турнирдара күһүн былааннанар. Дьокуускай куорат төрөөбүт күнүгэр. Бу туһунан Дьокуускай куорат физкултуураҕа уона успуорка управлениета иһитиннэрэр.