Биология институтугар баһаар тахса сыста

Бүгүн Дьокуускай куоракка баар РНА Сибиирдээҕи салаатын Саха сирин ирбэт тоҥ буордаах зонатын биологическай кыһалҕаларын чинчийэр институкка баһаар тахса сыспытын умуруорбуттарын туһунан Ыксаллаах быһыы-майгы министиэристибэтэ иһитиннэрэр.

Олунньу 13 күнүгэр ЫБММ баһаарынай сулууспатыгар Биология уонна ирбэт тоҥу үөрэтэр научнай институт дьиэтиттэн буруо тахса турарын туһунан иһитиннэрии киирбит. 71 киһи эвакуацияламмыт. Баһаар 1 кв.м иэннээх сири сиэбит.

Уот канцелярскай маллары харайар сиргэ, 4 этээскэ тахсыбыт. Эмсэҕэлээччи суох.

Баһаар биричиинэтинэн — электропровод хатыһыытыттан уот тахсыбыт буолуон сөп диэн сабаҕалыыллар.

Баһаары умуруорууга Дьокуускай баһаарынай-быыһыыр этэрээтин 44 лиичинэй састааба уонна 9 тиэхиньикэ  үлэлээтэ.