Биригээдэлэр чөлүгэр түһэрэр үлэни ыытарга бэлэмнэр

Ууга барбыт улуустарга чөлүгэр түһэрии үлэтигэр мобильнай хамаандалар тэриллэллэр.  Бастакынан чөлүгэр түһэрэр учаастактары быһаараллар, тутуу матырыйаалынан хааччыйыы былааннанар. Уу таһыма бүтүннүү түһэн, тырааныспар ситимэ сөргүтүллүбүтүн кэннэ үлэ тута саҕаланыаҕа. Бу туһунан өрөспүүбүлүкэ бырабыыталыстыбатын бэрэссэдээтэлин бастакы солбуйааччы Дмитрий Садовников суһал ыстаап мунньаҕын кэмигэр эттэ.

13 улуус Өймөкөөн оройуонугар көмөнү оҥорор былааннаах. Бу Бүлүү бөлөх улуустара — Ньурба, Сунтаар, Үөһээ Бүлүү, Бүлүү;  киин улуустар — Горнай, Хаҥалас, Нам уонна Дьокуускай; илин эҥээр — Уус-Алдан, Мэҥэ-Хаҥалас, Амма, Таатта, Чурапчы.

«Көмөлөһөр илиилэрин ууммут бары улуустарга махтанабыт. Хамаандалар кыаммат ыаллары, инбэлииттэри, байыаннай дьайыы кыттыылаахтарын кытта үлэлиэхтэрэ — көмө сыаллаах-соруктаах уонна олохтоох былаас уорганнарын кытта сөп түбэһиннэрэн ыытыллыаҕа», — диэн Дмитрий Садовников тоһоҕолоото.

Мунньахха билиһиннэриллибит иһитиннэриинэн,  уу таһыма намтыыр. Ол гынан баран, сорох сиргэ ардах түһүүтэ салҕанан барар, ол уу түһүүтүн бытаардар. Билиҥҥи туругунан, Абый улууһун Кэбэргэнэ сэлиэнньэтигэр биир тиэргэн учаастага уонна «Өймөкөөн» улуустааҕы трасса биир учаастага ууга баран тураллар. Халаан кэмигэр өрөспүүбүлүкэ үс улууһугар уопсайа 915 киһини олордор кыахтаах 13 быстах кэмҥэ олорор пууннары туруордулар. Бүгүҥҥү туругунан, бу пууннар үлэлэрэ түмүктэннэ, арай Өймөкөөн нэһилиэгэр биир дьиэ кэргэн хаалбыт. Уопсайа 154 киһи көһөрүлүннэ, ол иһигэр 45 оҕо.

Эмсэҕэлээбит нэһилиэнньэлээх пууннарга хамыыһыйалар хоромньуну ааҕан-суоттаан, үлэлии сылдьаллар. Үлэ уонна социальнай көмүскэл министиэристибэтин иһитиннэриитинэн, гражданнартан материальнай уонна үп көмөтүгэр 544 сайабылыанньа киирбит. Итинтэн 136-та баай-дуол сүппүтүн толуйуутугар анаммыт. Бары сайабылыанньалар көрүллэллэр. Гуманитарнай көмөнү тиэрдэргэ аҕыс рейс оҥоһуллубута. Таһаҕас өрөспүүбүлүкэтээҕи материальнай резервэттэн, өрөспүүбүлүкэ уопсастыбаннай тэрилтэлэрин уонна Уопсастыбаннай балаататын өйөбүллэринэн үөскээбитэ. Көмөнү оҥорбут хас биирдии дьоҥҥо ис сүрэхтэн махтал тылларын этэллэр.

«Олорор дьиэлэри уонна социальнай эбийиэктэри куурдар үлэ билигин саҕаланна», — диэн Дмитрий Садовников тоһоҕолоото.

Тырааныспар уонна суол эбийиэктэрин министиэристибэтигэр суол инфраструктуратын чөлүгэр түһэриигэ бары үлэни сүрүннүүр сорудах бэриллибит. Ону кытта тутуу матырыйаалыгар сайабылыанньа бэлэмнэнэр.

Сиһилии: https://www.sakha.gov.ru/news/8666